Yosua 3:1-17
-
Yisraele ekatisi Yordani (1-17)
3 Na nsima, Yosua alamukaki ntɔngɔntɔngɔ, mpe ye ná Bayisraele* nyonso balongwaki na Shitime+ mpe bakómaki na Yordani. Balalaki wana liboso ya kokatisa ebale.
2 Nsima ya mikolo misato, bakapita+ balekaki na kati ya kaa mobimba
3 mpe bapesaki bato mitindo ete: “Ntango kaka bokomona sanduku ya kondimana ya Yehova, Nzambe na bino, oyo banganga-nzambe Balevi+ bamemi, bosengeli kolongwa esika bozali mpe kolanda yango.
4 Kasi bosengeli kotika ntaka ya mapeko soki 2 000* kati na bino ná yango, bópusana penepene na yango te. Na ndenge yango bokoyeba nzela oyo bokokende, mpo boleká naino na nzela yango te.”
5 Bongo Yosua alobaki na bato: “Bómikómisa pɛto,+ mpo lobi Yehova akosala makambo ya kokamwa mpo na bino.”+
6 Na nsima, Yosua alobaki na banganga-nzambe boye: “Bózwa sanduku+ ya kondimana mpe bóleka liboso ya bato.” Bongo bazwaki sanduku ya kondimana mpe bakendaki liboso ya bato.
7 Bongo Yehova alobaki na Yosua boye: “Lelo, nakobanda kokómisa yo monene na miso ya Yisraele mobimba,+ mpo báyeba ete nakozala na yo+ kaka ndenge nazalaki na Moize.+
8 Osengeli kopesa banganga-nzambe oyo bamemi sanduku ya kondimana mitindo oyo: ‘Ntango bokokóma na libongo ya Yordani, bosengeli kopusana na mai mpe kotɛlɛma na kati ya Yordani.’”+
9 Bongo Yosua alobaki na Bayisraele: “Bóya awa mpe bóyoka maloba ya Yehova Nzambe na bino.”
10 Na nsima, Yosua alobaki boye: “Na likambo oyo, bokoyeba ete Nzambe ya bomoi azali na kati na bino+ mpe akobengana mpenza liboso na bino Bakanana, Bahiti, Bahivi, Baperizi, Bagirigashe, Baamore, ná Bayebusi.+
11 Talá! Sanduku ya kondimana ya Nkolo ya mabele mobimba ekoleka liboso na bino na kati ya Yordani.
12 Sikoyo, bópona mibali 12 na mabota ya Yisraele, mobali moko na libota moko,+
13 mpe ntango kaka banganga-nzambe oyo bamemi Sanduku ya Yehova, Nkolo ya mabele mobimba, bakotya makolo na mai ya Yordani, mai ya Yordani ekotika kotíyola mpe ekotɛlɛma lokola efelo.”+
14 Na yango, ntango bato balongwaki na bahema na bango liboso ya kokatisa Yordani, banganga-nzambe oyo bazalaki komema sanduku+ ya kondimana balekaki liboso na bango.
15 Ntango kaka baoyo bazalaki komema Sanduku bakómaki na Yordani mpe banganga-nzambe oyo bamemaki Sanduku yango bakɔtisaki makolo na bango na mai (nzokande na mikolo nyonso ya kobuka mbuma, Yordani etondisaka mai na bangámbo+ na yango),
16 mai oyo ezalaki kotíyola etɛlɛmaki esika moko. Emataki lokola efelo, mosika mpenza na Adama, engumba oyo ezali pene na Zaretane, mpe mai oyo ezalaki kokita mpo na kokende na mbu ya Araba, Mbu ya Mungwa,* ekaukaki. Mai yango etikaki kotíyola, mpe bato bakatisaki na esika oyo etalani na Yeriko.
17 Ntango banganga-nzambe oyo bamemaki sanduku ya kondimana ya Yehova batɛlɛmaki kozanga koningana na katikati ya Yordani na mabele oyo ekauki,+ Yisraele mobimba ekatisaki na mabele oyo ekauki,+ tii ntango ekólo mobimba esilisaki kokatisa Yordani.
