Liloba ya Nzambe ezali na nguya ya kobongola bomoi na biso. (Ebr 4:12) Kasi, mpo tózwa matomba na litambwisi, malako mpe toli na yango, tosengeli kondima ete ezali mpenza “liloba ya Nzambe.” (1Te 2:13) Ndenge nini tokoki kokómisa kondima na biso makasi na Biblia?

Tángáká eteni moko ya Biblia mokolo na mokolo. Ntango ozali kotánga, luká makambo oyo endimisi yo ete Yehova nde azali Mobandisi na yango. Na ndakisa, talelá batoli oyo ezali na mokanda ya Masese mpe luká koyeba ndenge bwanya na yango ezali na ntina mpo na biso lelo oyo.​—Mas 13:20; 14:30.

Salá programɛ na yo ya boyekoli. Luká koyeba malamumalamu makambo oyo endimisi yo ete Biblia ekomamaki na litambwisi ya elimo ya Nzambe. Na Buku ya bolukiluki mpo na Batatoli ya Yehova, luká na motó ya likambo “Biblia” mpe na nsima na motó moke ya likambo “Ekomami na litambwisi ya elimo ya Nzambe.” Okoki mpe kokómisa kondima na yo makasi ete nsango ya Biblia ebongwani te ntango ozali kotalela malamumalamu makambo oyo ezali na Lamuká! ya 04/2008, lokasa 12.

TALÁ VIDEO NTINA OYO TONDIMAKA LILOBA YA NZAMBE, MPE NA NSIMA YANOLÁ NA MITUNA OYO:

• Ndenge nini makambo oyo bamoni na efelo moko ya tempelo na Karnak, na Ezipito, emonisi ete Liloba ya Nzambe elobaka solo?

  Eyano na yo

• Ndenge nini toyebi ete nsango ya Biblia ebongwani te?

  Eyano na yo

• Lokola Biblia ezali tii lelo oyo, ndenge nini endimisi yo ete ezali Liloba ya Nzambe?​—Tángá Yisaya 40:8

  Eyano na yo