BOMOI YA BAKRISTO
Omibongisa banda sikoyo mpo na lisalisi ya monganga na lombangu
Mpo na nini komibongisa? Mpamba te tokoki koluka lisalisi ya monganga to kokɔta na lopitalo na mbalakaka. Na yango, liboso likambo moko ya mbalakaka ebima, salá nyonso oyo okoki mpo na koluka koyeba malamumalamu lisalisi ya monganga oyo esengeli. Kosala bongo, ekomonisa ete omemyaka bomoi mpe mobeko ya Yehova na oyo etali makila.—Mis 15:28, 29.
Makambo nini okoki kosala mpo na komibongisa?
-
Bondelá mpe tondisá malamumalamu karte DPA (Instructions médicales/Désignation d’une personne de confiance). a Basakoli oyo bazwi batisimo bakoki kozwa karte DPA epai ya ndeko oyo atalelaka mikanda na lisangá mpo na bango moko mpe Carte d’identité (ic) mpo na bana na bango ya mike
-
Soki ozali mwasi ya zemi, sɛngá bankulutu formilɛrɛ Makambo oyo mwasi ya zemi asengeli koyeba (S-401). Formilɛrɛ yango ekosalisa yo ozwa bikateli ya malamu na oyo etali lisalisi ya monganga oyo ekoki kobimisa mikakatano ntango ozali na zemi mpe kobota
-
Soki esɛngi ete ozwa lisalisi ya monganga oyo esɛngi makila to okɔta na lopitalo, yebisá bankulutu ya lisangá na bino liboso mpo báyeba mpe yebisá minganga ya lopitalo epai okokɔta ete Motatoli ya Yehova moko akoya kotalaka yo
Ndenge nini bankulutu bakoki kosalisa yo? Bakoki kosalisa yo otondisa karte DPA na yo. Kasi, Yebá ete bankulutu bakozwa bikateli te na esika na yo na oyo etali lisalisi nini ya monganga okosepela kozwa to komonisa makanisi na bango na likambo etali bikateli oyo moto ye moko asengeli kozwa. (Ro 14:12; Ga 6:5) Ntango oyebisi bankulutu ya lisangá na bino ete ozali kokutana na mikakatano na likambo etali lisalisi ya monganga oyo ekoki kosɛnga bázongisa yo makila, bakobenga na lombangu bandeko ya Komite ya boyokani na minganga (CLH) mpo na kosalisa yo.
Ndenge nini bandeko ya Komite ya boyokani na minganga bakoki kosalisa yo? Bandeko ya Komite yango basilá kozwa formasyo mpo na kosalisa minganga mpe bato ya mibeko báyeba bindimeli ya lingomba na biso na likambo etali makila. Bakoki kopesa mayele mosusu ya lisalisi ya monganga oyo ekosala ete bázongisa moto makila te. Soki esengeli, bakoki kosalisa yo okutana na monganga oyo andimaka kosalisa biso kozanga kozongisa makita.
TALÁ VIDEO NDENGE YA KOZWA EKATELI NA OYO ETALI LISALISI YA MONGANGA OYO ESƐNGI MAKILA, MPE NA NSIMA YANOLÁ NA MOTUNA OYO:
-
Makambo nini oyekoli na video oyo ekoki kosalisa yo omibongisa mpo na lisalisi ya monganga na lombangu mpe oyo esɛngi makila?
a Liteya 39 ya buku Sepelá na bomoi libela na libela! ekoki kosalisa yo ozwa bikateli na likambo etali lisalisi ya monganga oyo esɛngi makila.
