Kanisá ete ozali kofanda na Galile na mikolo ya Yesu. Osali mobembo na Yerusaleme mpo na fɛti ya mwa bandako ya matiti. Engumba etondi na ebele ya basambeli mosusu oyo bauti mosika mpenza. Olingi kopesa Yehova mbeka. Yo wana na ntaba na yo na mabɔkɔ, ozali kotambola na balabala ya engumba oyo etondi na bato mpe ozali kokende na tempelo. Ntango okómi na tempelo, okuti ebele ya bato mosusu oyo balingi mpe kopesa mbeka. Nsukansuka, ekómi ngala na yo ya kopesa banganga-nzambe ntaba na yo. Kaka na ntango wana okanisi ete ndeko na yo, oyo akoki kozala na kati ya ebele wana ya bato to na engumba, azali na likambo na yo. Yesu amonisi oyo osengeli kosala. (Tángá Matai 5:24.) Ndenge nini yo ná ye bokoki kotya kimya na kolanda malako oyo Yesu apesi? Na liste mokomoko oyo ezali awa na nse, tyá mokɔlɔtɔ na eyano ya malamu to luká eyano ya malamu.

OSENGELI . . .

• kosolola na ndeko na yo kaka soki omoni ete azali na ntina ya kosilika

• koluka kosembola makanisi ya ndeko na yo soki omoni ete asilikaka mpambampamba to ye mpe azali na foti na likambo yango

• koyoka na likebi ntango azali koloba, mpe ata soki okangi mpenza ntina te, sɛngá ye bolimbisi mpo na mpasi oyo ayoki to mpo na makama oyo okanaki te ete likambo yango ekoki kobimisa

NDEKO NA YO ASENGELI . . .

• koluka koyebisa bandeko mosusu na lisangá mabe oyo osalaki ye mpo bákɔtela ye

• kopamela yo mpe kolobela makambo mikemike ya likambo yango, mpe kosɛnga ete ondima libunga na yo

• kondima ete esɛngaki omonisa komikitisa mpe mpiko mpo okutana na ye, mpe kolimbisa na motema moko

Atako lelo oyo topesaka lisusu te bambeka ya banyama na losambo na biso, kasi Yesu alingaki mpenza koloba nini na likambo etali kozala na kimya elongo na bandeko na biso mpe losambo oyo Nzambe andimaka?