Tosalelaka malamu makasi na biso ntango tomityelaka mikano ya kosala mingi na mosala Yehova. (1Ko 9:26) Lokola nsuka ya mokili oyo ekómi pene, mikano ya malamu esalisaka biso tósalela malamu ntango moke oyo etikali. (Ef 5:15, 16) Na losambo na bino na kati ya libota, bokoki kolobela mikano oyo bokosepela kokokisa na mobu ya mosala ya sika. Mpo na kosalisa bino, mokanda ya likita oyo ezali na masolo mingi oyo emonisi lolenge ya mikano oyo bokoki kotalela mpe kobondela mpo na yango.​—Yak 1:5.

Na ndakisa, libota mobimba ekoki koyokana mpo ata moto moko akóma mobongisi-nzela. Soki bomoni ete bokokoka te kokokisa ngonga oyo esɛngamaka, bósolola na babongisi-nzela mosusu oyo mpe bazali kokutana na makambo ndenge moko na bino. (Mas 15:22) Bokoki mbala mosusu kobengisa mobongisi-nzela moko na losambo na bino na kati ya libota mpe kotuna ye mituna. Na nsima, bókoma mwa makanisi oyo bokoki kosalela mpo na kokokisa ngonga oyo esɛngamaka. Soki bosalaki mosala ya mobongisi-nzela na kala, bótalela soki bokoki kosala yango lisusu sikoyo.

Bato mosusu na kati ya libota bakoki kosala mosala ya mobongisi-nzela mosungi mpo na sanza moko to mibale. Soki ozali na makasi mingi te, okoki kolonga kosala mosala ya mobongisi-nzela mosungi soki ozali kosakola ata mwa moke mikolo nyonso. Soki ozalaka na ntango mingi te mpo na kobima mosala ya kosakola na kati ya pɔsɔ mpo okendaka mosala to kelasi, okoki kopona mbala mosusu sanza oyo ezalaka na mikolo ya bafɛti to oyo ezalaka na bapɔsɔ mitano. Bókoma ntango nini bokanisi kosala mosala ya mobongisi-nzela mosungi mpe bótya programɛ yango na kalandriye na bino.​—Mas 21:5.

TALÁ VIDEO ZALÁ NA MPIKO . . . MOBONGISI-NZELA, MPE NA NSIMA YANOLÁ NA MOTUNA OYO:

• Ndenge nini Yehova asalisaki ndeko mwasi Aamand? Lisolo na ye eteyi biso nini?