Na nsanza ya 09/2022, tokosala makasi tóbanda boyekoli ya Biblia na mwa buku Sepelá na bomoi libela na libela! na bato nyonso oyo tokokuta na bandako na bango. Basakoli bakoki kopona kosala mosala ya mobongisi-nzela mosungi mpo na ngonga 30. Ndenge nini tokosala kampanye yango ya sipesiale?

• Na bokutani ya liboso: Salelá lokasa ya nsuka ya mwa buku yango mpo na kopesa moto mposa ya koyoka yo, mpe meká kolakisa ye ndenge boyekoli ya Biblia esalemaka. Kobosana te kozongela bato oyo ozongelaka mbala na mbala mpe baoyo basepelaki na mbala ya nsuka oyo bosololaki. Ata soki liboso baboyaki koyekola Biblia, bakoki kosepela na lolenge ya sika oyo tozali koyekola na bato Biblia na mwa buku na biso. Tosengeli te kotika mwa buku yango na bandako oyo bato bazali te, mpe tosengeli te kotindela yango bato oyo basepelaki te mbala ya nsuka oyo tosololaki na bango. Bandeko ya Komite ya mosala ya lisangá bakozwa bibongiseli mpo na kosala makita mingi ya mosala ya kosakola na nsanza yango.

• Mabaku mosusu: Soki na lisangá na bino bosalelaka shario, tyá mwa buku Sepelá na bomoi libela na libela! na shario. Yebisá bato oyo basepeli kozwa mwa buku yango ete tokoki mpe koyekola na bango Biblia ofele na nzela ya mwa buku yango. Lakisá na mokuse ndenge boyekoli ya Biblia esalemaka, to bóyokana mpo na kosala yango mbala ya nsima. Mokɛngɛli na mosala ya kosakola akoki kosɛnga basakoli ya makoki bákende na bakompanyi to na bisika minene ya mombongo oyo ezali na teritware na bango mpo na koluka bato ya koyekola na bango Biblia. Okoki mpe kobandisa boyekoli ya Biblia na baninga ya mosala to bato oyo okutanaka na bango ntango ozali kopesa litatoli ya libaku malamu.

Yesu apesaki biso etinda ya ‘kokómisa bato bayekoli,’ mpe ‘koteya bango.’ (Mt 28:19, 20) Tiká ete kampanye oyo ya sipesiale esalisa biso tókokisa mokano yango, wana tozali kosalela buku Sepelá na bomoi libela na libela!