Na mokanda oyo akomelaki Tito na litambwisi ya elimo santu, ntoma Paulo akomaki ete bilenge mibali, ata mpe Tito, basengeli kosala nyonso bázala ‘ndakisa na misala ya malamu na makambo nyonso.’ (Tit 2:6, 7) Kaka na mokapo yango, amonisaki mpe ete basaleli ya Yehova bapetolami mpo bázala na “molende na misala ya malamu.” (Tit 2:14) Moko ya misala ya malamu yango ezali ya kosakola mpe koteya makambo etali Bokonzi ya Nzambe. Soki ozali elenge, okanisi nini soki osaleli makasi na yo na mosala ya mobongisi-nzela mosungi to ya sanza na sanza?​—Mas 20:29.

Soki okolinga kosala mosala ya mobongisi-nzela, kanisá makambo oyo okosala mpo okóma mobongisi-nzela. (Lk 14:28-30) Na ndakisa, okozwa mbongo wapi mpo na kokokisa bamposa na yo ntango okosala mosala yango? Ndenge nini okokokisa ngonga oyo esɛngami? Bondelá Yehova asalisa yo. (Nz 37:5) Sololá na baboti na yo mpo na mokano na yo mpe na babongisi-nzela oyo bazali kolonga na mosala yango. Na nsima bandá kosala makambo oyo esengeli mpo na kokokisa mokano na yo. Na ntembe te, Yehova akopambola milende na yo na mosala na ye!

TALÁ VIDEO BILENGE OYO BAZALI KOKUMISA YEHOVA, MPE NA NSIMA YANOLÁ NA MITUNA OYO:

• Mikakatano nini bilenge mosusu balongaki mpo bákóma babongisi-nzela, mpe ndenge nini basalaki yango?

• Ndenge nini baboti bakoki kosalisa bana na bango bákóma babongisi-nzela ya sanza na sanza?

• Mpo na nini ezali na ntina kozala na programɛ ya mosala ya kosakola?

• Ndenge nini bandeko ya lisangá bakoki kolendisa mpe kosalisa mobongisi-nzela?

• Mapamboli nini babongisi-nzela bazwaka?