Yesu apesaki litatoli ya libaku malamu epai ya mwasi Mosamaria mpo abandisaki naino lisolo ná ye. Ndenge nini tokoki kokolisa makoki na biso ya kobanda masolo ná bato oyo toyebi te?

• Zalá na boboto mpe sololáká na bato. Atako Yesu alɛmbaki, abandaki lisolo kaka na kosɛnga mai ya komɛla. Yo mpe okoki kobanda naino na kopesa moto mbote na esengo mpe na nsima okoki kolobela ndenge moi to malili ezali makasi to kolobela likambo moko oyo ezali koleka na esika ofandi. Kobosana te, mokano ya liboso ezali ya kobanda naino lisolo, yango wana, lobelá likambo nyonso oyo omoni ete ekoki kobenda likebi ya moto. Soki asepeli te, ekosala eloko te. Meká lisusu kosolola na moto mosusu. Sɛngá Yehova apesa yo mpiko.​—Ne 2:4; Mis 4:29.

• Salelá mabaku nyonso oyo emonani mpo na koteya nsango malamu, kasi kowela te. Tiká lisolo ekoba yango moko. Soki ozali kotinda moto aloba na makasi, akoki komona yango mabe mpe kokata lisolo. Kolɛmba nzoto te soki lisolo ekatani liboso ete opesa litatoli. Soki obangaka kolobela nsango malamu na libaku malamu, meká kobanda lisolo na moto kozanga ete okana kopesa litatoli. [Lakisá video 1 mpe bólobela yango.]

• Luká kolobela likambo moko etali kondima na yo oyo ekopesa yo libaku ya kopesa litatoli; oyo ekotinda moto oyo azali koyoka yo asɛnga ete olimbolela ye yango. Yesu alobaki likambo moko ya kokamwa oyo etindaki mwasi yango atuna mituna. Nsukansuka ntango asakwelaki mwasi yango nsango malamu, ayanolaki nde kaka na mituna oyo atunaki. [Lakisá video 2 mpe bólobela yango, na nsima lakisá video 3 mpe bólobela yango.]