MPO NA NINI EZALI NA NTINA: Bakristo oyo batyami mafuta na elimo mpe bampate mosusu babengisaka bato ya ndenge nyonso ‘bákamata mai ya bomoi ofele.’ (Em 22:17) Mai yango ya elilingi ezali bibongiseli nyonso oyo Yehova azwi mpo na kosikola bato ya botosi na lisumu mpe na liwa. Mpo na kosalisa bato oyo bazali na mimeseno mpe bindimeli ndenge na ndenge, tosengeli kosakola “nsango malamu ya seko” na ndenge oyo ekosepelisa mokomoko na bango.​—Em 14:6.

NDENGE YA KOSALA YANGO:

• Poná lisolo mpe vɛrsɛ oyo ekosimba mitema ya bato ya teritware na bino. Okoki kopona ndenge ya kobanda lisolo to likambo moko oyo omonaka ete esalisaka yo osolola malamu na bato. Masolo mpe bavɛrsɛ nini bato basepelaka na yango? Ezali na likambo moko oyo euti kosalema, oyo bato mingi bazali kokanisa mpe kolobela yango? Lisolo nini ekoki kosepelisa mwasi to mobali?

• Pesá mbote mpe salá makambo oyo bato ya teritware na bino bameseni na yango ntango olingi kosolola na moto.​—2Ko 6:3, 4

• Mesaná na mikanda mpe bavideo oyo ezali na kati ya bisaleli na biso mpo na koteya mpo na kosalisa moto oyo asepeli na nsango malamu

• Zwá na Internet mikanda to bavideo na minɔkɔ oyo bato balobaka na teritware na bino

• Bongolá mwa moke lisolo na yo mpo na kokokisa mposa ya nkolo-ndako. (1Ko 9:19-23) Na ndakisa, okoloba nini soki oyebi ete nkolo-ndako auti kobungisa moto moko na liwa?

TALÁ VIDEO, MPE NA NSIMA YANOLÁ NA MITUNA OYO:

• Lisolo nini mosakoli abandaki kosolola na nkolo-ndako?

• Nkolo-ndako akutanaki na makambo nini?

• Vɛrsɛ nini ebongaki mpenza mosakoli asalela na libaku oyo, mpe mpo na nini?

• Ndenge nini obongolaka ndenge na yo ya kobanda lisolo mpo esepelisa bato na teritware na bino?