Disiplini elimboli libosoliboso kolakisa to koteya, kasi ekoki mpe kolimbola kosembola mpe kopesa etumbu. Yehova apesaka biso disiplini mpo tósambela ye na ndenge oyo ye alingaka. (Ro 12:1; Ebr 12:10, 11) Na bantango mosusu, ekómaka mpasi kondima disiplini, kasi yango ekoki kokómisa moto moyengebene mpe komemela ye mapamboli soki asaleli yango. (Mas 10:7) Makambo nini moto oyo azali kopesa disiplini mpe moto oyo bapesi ye disiplini basengeli koyeba?

Moto oyo azali kopesa disiplini. Bankulutu, baboti, mpe bato mosusu basengeli kosala makasi mpo bápesaka disiplini na boboto mpe na bolingo ndenge Yehova asalaka yango. (Yir 46:28) Ata soki esɛngi kopesa disiplini ya makasi, yango esengeli koyokana na likambo oyo moto asali mpe esengeli kosala yango na bolingo mpenza.​—Tit 1:13.

Moto oyo bapesi ye disiplini. Ezala bapesi biso disiplini ya lolenge nini, tosengeli te koboya yango, tosengeli nde kosala milende mpo na kosalela yango mbala moko. (Mas 3:11, 12) Lokola tozali bato ya kozanga kokoka, biso nyonso tozalaka na mposa bápesa biso disiplini, ata soki disiplini yango ezali ya lolenge nini. Tokoki kozwa disiplini na nzela ya makambo oyo totángaka na Biblia to na nzela ya makambo oyo toyokaka na makita ya lisangá. To na bantango mosusu, tokoki kozwa disiplini na nzela ya komite ya kosambisa. Soki tondimi disiplini mpe tosaleli yango, tokozala na bomoi ya malamu mpe na mikolo ezali koya tokozwa bomoi ya seko.​—Mas 10:17.

TALÁ VIDEO “YEHOVA APESAKA DISIPLINI NA BATO OYO YE ALINGAKA,” MPE NA NSIMA YANOLÁ NA MITUNA OYO:

• Bomoi ya Canon ezalaki ndenge nini ntango azalaki naino mwana moke, mpe ndenge nini bomoi na ye ebongwanaki?

• Disiplini nini ya bolingo Yehova apesaki Canon?

• Lisolo na ye eteyi biso nini?