BÓSƐNZƐLAKA!

Etumba ya Ukraine ebakisi nzala na mokili mobimba

YOKÁ NA

Na mokolo ya 19/05/2022, na likita ya ebongiseli ya ONU oyo babengi Conseil de sécurité, bakonzi minene koleka 75 balobaki ete “kozanga ya bilei na mokili mobimba, oyo maladi ya Coronavirus mpe mbongwana ya klima ebimisi, ezali kokóma lisusu makasi mpo na etumba ya Ukraine.” Zulunalo The Economist elobaki ete “etumba yango ekosala ete nzala ekóma lisusu makasi na mokili oyo etondi na mikakatano.” Biblia esakolaki ete nzala ya bongo ekozala na ntango na biso, kasi eyebisi biso mpe ndenge ya kosala mpo na mokakatano yango.

Biblia esakolaki ete nzala ekozala

Yesu alobaki: “Ekólo ekobunda na ekólo mpe bokonzi ekobunda na bokonzi, mpe nzala ekozala.”—Matai 24:7.
Mokanda ya Emoniseli elobeli batambwisi-mpunda minei ya elilingi. Moko na batambwisi-mpunda yango ezali komonisa etumba. Na nsima na ye, ezali na mosusu oyo ezali komonisa nzala, ntango oyo biloko ya kolya ekokóma mpasi mpe ekomata mpenza ntalo. Biblia elobi: “Namoni punda ya mwindu. Moto oyo amati yango asimbi eloko ya komekela kilo. Nayoki lokola mongongo moko . . . elobi: ‘lifuta ya mokolo moko ya mosala ekozala bobele po na kopo moko ya blé, to bakopo misato ya orje.’”—Emoniseli 6:5, 6, Bible na Lingala ya lelo oyo.

Makambo oyo Biblia elobaki mpo na kozanga ya biloko ya kolya ezali kokokisama sikoyo na ntango oyo Biblia ebengi “mikolo ya nsuka.” (2 Timote 3:1) Mpo na koyeba makambo mosusu oyo etali “mikolo ya nsuka” mpe batambwisi-mpunda minei ya mokanda ya Emoniseli, talá video Mokili ebongwaná banda 1914 mpe tángá lisolo “Batambwisi-mpunda minei yango bazali banani?”

Ndenge oyo Biblia ekoki kosalisa yo

Biblia ezali na batoli ya malamu oyo ekoki kosalisa biso na ntango ya mikakatano, na ndakisa ntango biloko ya kolya ekómi ntalo mingi to ata na ntango ya nzala. Talá batoli yango mosusu na lisolo “Okosala nini soki ozali lisusu na mbongo mingi te?”
Biblia epesi biso mpe elikya ete makambo ekobonga. Elaki ete mokolo mosusu “mbuma ekozala beboo na mabele” mpe moto nyonso akozala na biloko ebele ya kolya. (Nzembo 72:16) Mpo na koyeba makambo mosusu oyo etali elikya oyo Biblia epesi mpe ntina oyo okoki kondima yango, tángá lisolo “Elikya ya solosolo mpo na mikolo ezali koya.”