Soki obungisi mosala, kozwa mbongo ekoki kokóma mpasi, okoki komitungisa mpe kobanga. Makanisi oyo elandi, oyo euti na Biblia, ekoki kosalisa yo.

•   Yebisá basusu ndenge ozali komiyoka.

   Oyo Biblia elobi: “Moninga ya solosolo alingaka ntango nyonso.”​—Masese 17:17.

   Nsima ya kobungisa mosala, okoki koyoka mawa, nkanda, kobulungana, to komona ete nyonso ebebi. Soki oyebisi bandeko ya libota to baninga na yo ya motema ndenge oyo ozali komiyoka, bakoki kosalisa yo okitisa motema. Bakoki mpe kopesa yo toli ya sikisiki oyo ekoki kosalisa yo ozwa mosala mosusu.

•   Boyá komitungisa koleka ndelo.

   Oyo Biblia elobi: “Bómitungisa ata moke te mpo na mokolo oyo ekolanda, mpo mokolo oyo ekolanda ekozala na mitungisi na yango moko. Mokolo na mokolo ezali na mitungisi na yango.”​—Matai 6:34.

   Biblia elendisi biso tóbongisaka makambo liboso. (Masese 21:5) Kasi, eyebisaka biso mpe tóboya komitungisa koleka ndelo mpo na mikolo ezali koya. Mbala mingi tomitungisaka mpo na makambo oyo ekoki kosalema te. Ezali malamu okanisa nde oyo okoki kosala lelo.

   Biblia epesi toli ya bwanya mpenza oyo ekoki kosalisa yo oyeba oyo okoki kosala mpo olonga mitungisi oyo ozali na yango. Mpo na koyeba makambo mosusu, tángá lisolo “Oyo okoki kosala mpo na kolonga kotungisama.”

•   Bongisá ndenge oyo osalelaka mbongo na yo.

   Oyo Biblia elobi: ‘Nayebi mpenza ndenge ya kozala na biloko mingi mpe ya kokelela.’​—Bafilipi 4:12.

   Mesaná na makambo ya bomoi oyo okómi na yango sikoyo. Yango esɛngi mpe kobongola lolenge na yo ya kosalela mbongo, elingi koloba, kosalela mbongo na mayele mpo ekokisa bamposa na yo. Boyá kokɔta banyongo oyo ezangá ntina.​—Masese 22:7.

   Mpo na koyeba makambo mosusu na oyo etali ndenge ya kosalela mbongo na mayele, talá lisolo “Okosala nini soki ozali lisusu na mbongo mingi te?”

•   Salelá ntango na yo na mayele.

   Oyo Biblia elobi: “Bókoba kotambola na bwanya . . . , bómisombela ntango oyo ebongi.”​—Bakolose 4:5.

   Ata soki ozali lisusu kokende mosala te, kobongola te ndenge oyo osalelaka ntango na yo. Kosala bongo ekosalisa yo osalaka makambo na molɔngɔ mpe opesaka nzoto na yo kilo.

•   Yebá komesana na makambo ya sika.

   Oyo Biblia elobi: “Na mosala makasi ya ndenge nyonso litomba ezalaka, kasi liloba ya mbɛbu mpamba ememaka na kokelela.”​—Masese 14:23.

   Ndimá kosala mosala oyo ekeseni na oyo ozalaki kosala liboso. Ekoki kosɛnga ete osala mosala oyo bato bamonaka ete ezali na ntina te, to mpe oyo ekofuta yo mbongo moke koleka mosala oyo ozalaki kosala liboso.

•   Kolɛmba te.

   Oyo Biblia elobi: “Na ntɔngɔ, loná mboto na yo mpe tii na mpokwa kopemisa lobɔkɔ na yo te; mpo oyebi te epai wapi yango ekolonga, ezala awa to kuna, to soki yango nyonso mibale ekozala malamu.”​—Mosakoli 11:6.

   Kobá koluka mosala. Yebisá basusu ete ozali koluka mosala. Sololá na bandeko ya libota, baninga, baninga na yo ya mosala ya kala, mpe bato ya kartye. Luká bakompanyi oyo ezwaka bato na mosala, bansango ya makambo etali mosala, to mpe bakompanyi oyo ezali koluka bato na mosala na nzela ya Internet. Omibongisa malamu liboso ya kokende na esika oyo batunaka bato oyo bazali koluka mosala mituna mpe kɔtisá mokanda mpo na koluka mosala na bisika mingi.