BÓSƐNZƐLAKA!
Mobulu na makambo ya politiki—Biblia elobi nini?
Mobulu oyo ezali kosalema mingi na makambo ya politiki na mokili mobimba ezali kobangisa bato mingi.
Kaka na eleko ya maponami ya 2023-2024 na Mexique, motángo ya bato ya politiki oyo babomamaki, na ndenge oyo esalemá naino te, ekómaki 39. Longola yango, lolenge mosusu ya mobulu na makambo ya politiki oyo ebebisaki maponami yango mpe esalemaki.
Kala mingi te na Mpoto, mobulu na makambo ya politiki eutaki kosalema mingi mpenza; kutu na mokolo ya 15/05/2024, balukaki koboma premier ministre ya ekólo Slovaquie.
Ekólo États-Unis eninganaki na mokolo ya 13/07/2024 mpo balulaki koboma Donald Trump, prezida ya kala ya ekólo yango.
Mpo na nini mobulu ekómi mingi boye na makambo ya politiki? Makambo ya mobulu yango ekosila mokolo mosusu? Biblia elobi nini?
Biblia esakolaki ete bato bakokabwana mpo na politiki
Biblia esakolaki ete na eleko na biso, oyo ebengi yango “mikolo ya nsuka,” bato mingi bakozala na bizaleli oyo ekobimisa mobulu mpe kozanga koyokana.
“Mikolo ya nsuka ekozala ntango moko ya mpasi mpenza mpe ya mikakatano. Mpo bato bakozala . . . bato oyo bazangi botɔndi, oyo bazangi bosembo, . . . oyo balingaka kosala boyokani te, . . . bato ya nko, . . . oyo batɛkaka bamosusu, bato ya motó makasi, oyo bavimbi na lolendo.”—2 Timote 3:1-4.
Biblia esakolaki mpe ete makambo ya mobulu, na ndakisa, kotombokela bakonzi ya guvɛrnema mpe yikiyiki na makambo ya politiki ekokóma mingi na mikolo na biso. (Luka 21:9, maloba na nse ya lokasa) Kasi, yikiyiki na makambo ya politiki mpe bokabwani ekoumela libela te.
Mobulu na makambo ya politiki ekosila
Biblia elobi ete Nzambe akolongola baguvɛrnema nyonso ya bato mpe akotya guvɛrnema na ye oyo ezali na likoló.
“Nzambe ya likoló akotya bokonzi moko oyo . . . ekobukabuka makonzi yango nyonso mpe ekosukisa yango, mpe yango moko ekotikala mpo na libela.”—Danyele 2:44.
Bokonzi ya Nzambe ekosala ete bato bázala na bomoko mpe ekotya kimya na mokili mobimba.
Mokonzi na yango, Yesu Kristo, abengami “Nkumu ya Kimya,” akosala ete ‘kimya ezala na nsuka te.’—Yisaya 9:6, 7.
Ata mpe sikoyo, baoyo bokonzi yango ezali koyangela bazali koyekola ndenge ya kofanda na kimya. Yango wana Biblia elobi ete: “Bakokómisa mipanga na bango bitimweli ya mabele mpe makɔnga na bango makwangola ya kokata matiti. Ekólo moko ekotombola mopanga te mpo na kobunda na ekólo mosusu, bakoyekola mpe etumba lisusu te.”—Yisaya 2:3, 4.
Mpo na koyeba makambo mosusu, tángá lisolo “Bokonzi ya Nzambe ekosala nini?” mpe talá video Bokonzi ya Nzambe ezali nini?
Talá mpe...
LINƆ́NGI YA MOSƐNZƐLI
Bokonzi ya Nzambe ekosala makambo nini?
Yesu ayebaki ete kaka Bokonzi ya Nzambe nde ekosilisa makambo ya mabe oyo ezali kosalema na mokili. Makambo nini Bokonzi ya Nzambe esí esali oyo ebakisi kondima na yo?
BÓSƐNZƐLAKA!
Bato bazali lisusu kotyela bato ya politiki motema te—Biblia elobi nini?
Biblia elendisi biso tókeba na bato oyo totyelaka motema mpe elakisi biso nzela kaka moko oyo ebongi kotyela motema mpo na avenire ya malamu.
LINƆ́NGI YA MOSƐNZƐLI
Nani nde Nzambe aponi azala Mokonzi?
MAKAMBO MOSUSU
Elikya ya solosolo mpo na mikolo ezali koya
Mpo nini bilaka oyo ezali na Biblia ekeseni mpenza bisakweli mpe bilaka oyo bato bapesaka?
MATEYA YA BIBLIA
Meká boyekoli na biso ya Biblia
Bandá boyekoli ya Biblia ofele mpe talá makambo oyo esengeli kosala.
