Terorisme ekosila mokolo mosusu?
Soki terorisme esalemi, okoki komituna boye: ‘Nzambe akipaka biso mpenza? Mpo na nini makambo ya boye ezali kosalema? Terorisme a ekosila mokolo mosusu? Ndenge nini nakoki kolongola kobanga oyo nazali na yango?’ Biblia epesi biyano na mituna yango.
Ndenge nini Nzambe atalelaka terorisme?
Nzambe ayinaka mobulu mpe terorisme. (Nzembo 11:5; Masese 6:16, 17) Lisusu Yesu, momonisi ya Nzambe, apamelaki bayekoli na ye ntango balukaki kosala mobulu. (Matai 26:50-52) Atako bateroriste balobaka ete basalaka mobulu na nkombo ya Nzambe, Nzambe apesá bango ndingisa ya kosala makambo wana te. Kutu, ayokaka mabondeli na bango te.—Yisaya 1:15.
Nzambe akipaka bato nyonso oyo bazali konyokwama, ezala mpe baoyo bakutani na makambo ya terorisme. (Nzembo 31:7; 1 Petro 5:7) Biblia emonisi ete Nzambe akosilisa mobulu nyonso.—Yisaya 60:18.
Ntina oyo terorisme epalangani lelo oyo
Biblia emonisi biso ntina oyo terorisme ezali lelo oyo, elobi boye: “Moto ayangeli moto mpo na komonisa ye mpasi.” (Mosakoli 8:9) Na lisolo ya bomoi ya bato, bato mingi oyo bazalaka na bokonzi basalelaka bokonzi na bango mpo na konyokola basusu. Lokola bato yango banyokwamaka, yango wana basalelaka terorisme mpo na kozongisa mabe na mabe.—Mosakoli 7:7.
Nsuka ya terorisme
Nzambe alaki ete akosilisa makambo oyo ebangisaka bato mpe mobulu, mpe akotya kimya awa na mabele. (Yisaya 32:18; Mika 4:3, 4) Akani:
Kolongola makambo oyo esalaka ete terorisme ezala. Nzambe akolongola baguvɛrnema ya bato mpe akotya Bokonzi oyo ekoyangela mabele mobimba. Yesu Mokonzi ya Bokonzi yango, akosalela bato makambo na bosembo, mpe akolongola makambo oyo esalaka ete bato banyokwama mpe mobulu. (Nzembo 72:2, 14) Na ntango yango, moto moko te akosala makambo ya terorisme. Bato “bakosepela mpenza na kimya mingi.”—Nzembo 37:10, 11.
Kolongola makambo nyonso oyo terorisme ebimisá. Nzambe akosilisa makambo nyonso ya mabe oyo terorisme ebimiselá bato, ezala na nzoto to mpe na makanisi. (Yisaya 65:17; Emoniseli 21:3, 4) Alaki kutu kosekwisa bakufi, kozongisa bango na bomoi na mokili moko ya kimya.—Yoane 5:28, 29.
Biblia epesi biso bantina oyo esengeli kotinda biso tóndima ete Nzambe akokokisa makambo yango mosika te. Kasi, okoki komituna boye: ‘Mpo na nini Nzambe asilisá terorisme te banda kala?’ Mpo na kozwa eyano, talá video Mpo na nini Nzambe atiki nzela na bampasi?
a “Terorisme” emonisaka mbala mingi kosala to kosalela bato makambo ya mobulu, mingimingi bato oyo bazali basoda te mpo na kobangisa bango mpe kotinda bango básala mbongwana na makambo ya politiki, ya losambo mpe na makambo mosusu ya bomoi. Kasi, bato bakoki koboya kondima ete likambo moko oyo esalemaki ezali terorisme.
Talá mpe...
MAKAMBO MOSUSU
Nasala nini mpo namitungisa koleka ndelo te?
Batoli nini mpe bavɛrsɛ nini ya Biblia ekoki kosalisa yo okitisa mitungisi na yo?
MAKAMBO MOSUSU
Elikya ya solosolo mpo na mikolo ezali koya
Mpo nini bilaka oyo ezali na Biblia ekeseni mpenza bisakweli mpe bilaka oyo bato bapesaka?
BIYANO NA MITUNA YA BIBLIA
Bokonzi ya Nzambe ezali nini?
Talá ntina oyo Bokonzi ya Nzambe eleki baguvɛrnema mosusu nyonso.
LINƆ́NGI YA MOSƐNZƐLI
Bokonzi ya Nzambe ekosala makambo nini?
Yesu ayebaki ete kaka Bokonzi ya Nzambe nde ekosilisa makambo ya mabe oyo ezali kosalema na mokili. Makambo nini Bokonzi ya Nzambe esí esali oyo ebakisi kondima na yo?
MAKAMBO MOSUSU
Bosembo ekozala mokolo mosusu awa na mabele?
Biblia emonisi ete bosembo ya solosolo eutaka epai ya Nzambe, oyo azwaka bomoi ya bato nyonso ndenge moko.
MATEYA MPENZA YA BIBLIA
Mpo na nini Nzambe atiki nzela na bampasi?
Bato mingi batunaka ntina oyo mokili etondi na koyinana mpe bampasi. Biblia epesi eyano ya malamu mpe ya kolendisa.
