Lokola bankóto ya bato bazali se kozwa batisimo mbula na mbula, tozali na mposa ya bandako mingi ya losambo mpo na Yehova. Mpo na kokokisa mposa yango, Departema ya kosala baplan mpe kotonga na bitúká (LDC) ekanaki kotonga to kobongisa bisika ya losambo koleka 2 700 na boumeli ya mobu ya mosala ya 2020. a

 Kasi, makambo esimbaki te mpo na COVID-19. Mpo na kobatela bandeko na biso mpe mpo na kotosa mibeko oyo bakonzi ya Leta batye, Komite ya kobimisa mikanda ya Lisangani ya Mikóló-Bakambi elobaki ete bandeko oyo basalaka na botongi bátika naino kotonga na mokili mobimba. Ata bongo, na boumeli ya mobu ya mosala ya 2020, batongaki mpe babongisaki lisusu bisika ya losambo koleka 1 700 liboso coronavirus ebanda. Longola yango, misala mosusu ya minene koleka 100 oyo etali bafiliale esalemaki. Talá ndenge misala ya botongi oyo esalemaki na bafiliale mibale ememelaki bandeko na biso matomba.

 Filiale ya Cameroun. Filiale ya kala, oyo ezalaki na Douala, ekómaki moke mpenza mpe esɛngaki kotonga bandako mosusu. Komite ya kobimisa mikanda emonaki malamu bábongisa lisusu filiale yango, kasi mbongo mpo na kobongisa yango elekaki motuya ya bandako ya filiale yango. Balukaki mpe koyeba soki bakokaki kotonga ndako mosusu to kosomba mpe kobongisa lisusu ndako oyo ezalaki, kasi nyonso wana esimbaki te.

 Kaka na ntango yango, bandeko bayokaki ete na nɔrdi ya engumba Douala, bakonzi ya Leta bazwaki likanisi ya kotonga nzela oyo ezali komema na moko ya Bandako ya mayangani na biso. Nzela yango ekopesa likoki ya kokende na esika yango mpe ekosala ete kura, mai mpe makambo mosusu ezala malamu. Yango nde ezalaki mposa ya bandeko ya Komite ya filiale. Na yango, Lisangani ya Mikóló-Bakambi endimaki bátonga filiale ya sika na kati ya lopango ya Ndako ya mayangani.

 Batatoli ya Yehova basalaki elongo na basali ya kompanyi mosusu mpo na kotonga bandako yango, yango esalaki ete mbongo ebatelama mpe ntango eleka mingi te. Mosala yango ezwaki mosolo dolare koleka milio 2, mpe ezwaki mbongo moke koleka ndenge bakanisaki! Libota ya Betele ekómaki kofanda na bandako yango mwa moke liboso COVID-19 ebanda.

 Bandeko ya Betele ya Cameroun bazali kofanda sikoyo na bandako ya kitoko mpe bazali kosala na babiro ya kitoko, mpe bazali komona ete filiale yango ya sika ezali likabo euti epai ya Yehova. Ndeko moko ná mwasi na ye balobi boye: “Tolingi kosala misala makasi mpe kozwa likabo yango na valɛrɛ mingi.”

 Biro ya kobongola mikanda na mosika na monɔkɔ ya Tojolabal, na ekólo Mexique. Eleki sikoyo bambula mingi, ekipi ya kobongola na monɔkɔ ya Tojolabal ezalaki kosala mosala na yango na filiale ya Amérique centrale, oyo ezali pene na engumba Mexico. Nzokande, monɔkɔ ya Tojolabal elobamaka mingi na Altamirano mpe na Las Margaritas, oyo ezali na ntaka ya kilomɛtrɛ 1 000! Yango esalaki ete babongoli bákóma na mokakatano ya kobongola malamu monɔkɔ ya Tojolabal. Mpe filiale ezalaki na mokakatano ya kozwa bandeko ya makoki mpo na kopesa mabɔkɔ na ekipi ya babongoli na monɔkɔ ya Tojolabal mpe bandeko mosusu mpo na kokɔtisa mongongo na stidio.

 Yango wana, Komite ya bokomi ya Lisangani ya Mikóló-Bakambi emonaki malamu ete ekipi ya babongoli na monɔkɔ ya Tojolabal ekende na esika oyo balobaka monɔkɔ yango. Mpo na yango, filiale ezwaki ekateli ya kosomba ndako moko mpe kobongisa yango lisusu. Kosala bongo esalaki ete mbongo mingi ebatelama na esika ya kotonga ndako mosusu to kofutela.

 Mobongoli moko alobeli matomba oyo azwi: “Na boumeli ya mbula 10 oyo nasalaki na mosala ya kobongola na filiale, nakutanaki ata mokolo moko te na libota oyo elobaka monɔkɔ na ngai. Sikoyo biro na biso ezali mpenza na esika oyo balobaka monɔkɔ ya Tojolabal. Mokolo nyonso nasololaka na bato oyo balobaka monɔkɔ ya Tojolabal. Yango esali ete nayeba makambo mingi ya monɔkɔ na biso mpe nabongisa lisusu mosala na ngai ya kobongola.”

 Mpo na mobu ya mosala ya 2021, soki makambo etamboli malamu, mposa ezali ya kotonga bandako 75 ya babiro ya kobongola na mosika mpe bandako ya biteyelo ya Teokrasi. Tokokoba kosala misala minene na bafiliale 8, ezala mpe mosala ya biro monene na Ramapo, na New York, mpe kolongola filiale ya Argentine mpe ya Italie esika ezali mpo ekende esika mosusu. Longola yango, tozali na mposa ya kotonga Bandako ya Bokonzi ya sika koleka 1 000, mpe kolongola bisika ya losambo koleka 6 000 oyo ebongi te mpe kobongisa yango lisusu, mpe kobongisa lisusu Bandako ya Bokonzi 4 000.

 Mbongo mpo na kosala misala wana nyonso ekouta wapi? Ndeko Lázaro González, moko ya bandeko ya Komite ya filiale, apesaki eyano na motuna yango ntango bazalaki kolobela mosala ya kotonga biro ya kobongola na mosika na monɔkɔ ya Tojolabal, alobaki boye: “Na teritware ya filiale na biso, bato bazalaka mpenza na mbongo mingi te. Soki ezalaki te mpo na lisungi ya bandeko nyonso na mokili mobimba, elingaki kozala mpasi tótonga babiro ya kobongola mpo na bandeko na biso oyo bafandaka mosika. Makabo oyo bandeko bapesaka na mokili mobimba esalaki ete bandeko na biso babongoli bákóma pene na bandeko oyo balobaka minɔkɔ na bango ya mboka. Tozali kopesa matɔndi mingi epai ya bandeko na biso ya mokili mobimba mpo na makabo na bango ya bolingo malamu.” Soki mosala ya botongi ezali kosalema, ezali mpo na makabo na bino mpo na kosunga mosala ya kosakola na mokili mobimba, bandeko mingi bapesaka makabo na nzela ya donate.pr418.com.