Na mokolo ya 13/12/2019, na liyangani oyo esangisaki mikili mingi, Batatoli ya Yehova bapesaki liyebisi ete Libongoli ya Mokili ya Sika ya Makomami ya Grɛki ya bokristo ebimi na elobeli ya bababa ya Argentine (LSA). Ezalaki mbala ya liboso ete Makomami ya Grɛki ya bokristo ebongolama na elobeli ya bababa ya Argentine (LSA).

Na mokolo ya 03/12/2014, babongoli babandaki mosala yango oyo ezwaki ntango mpenza, babandaki na mokanda ya Matai. Lokola basalelaka bavideo na elobeli ya bababa, soki kaka mokanda moko ya Biblia esili kobongolama, bazalaki kotya yango mbala moko na programɛ JW Library Sign Language.

Na kotalela baankɛtɛ oyo esalemi, emonani ete bato soki 400 000 basalelaka elobeli ya LSA na Argentine. Lisusu, ezali na basakoli soki 2 700 oyo basalelaka elobeli ya LSA, kati na bango ezali na basakoli 470 oyo bazali bababa. Ndeko mwasi Laura Losada, oyo ayokaka te mpe asalelaka elobeli ya LSA, alobi boye: “Nazali na esengo mpe nazali kopesa Yehova matɔndi mingi mpo na ndenge apesi biso esaleli oyo. Kala, ntango tozalaki na Biblia te na monɔkɔ ya LSA, nazalaki komeka kotánga Biblia na libongoli ya Espagnol kasi nazalaki kokanga ntina te ya makambo oyo nazalaki kotánga. Sikoyo, lokola tozali na libongoli oyo ya sika mpe ya pɛtɛɛ, nazali komona mpenza ete boyokani na ngai ná Yehova ekómi makasi.”

Bandeko oyo basalelaka elobeli ya LSA bazali kopesa Yehova matɔndi mingi mpo na ndenge apesi bango esaleli oyo ezali pɛtɛɛ mpo na kokanga ntina, mpe ezali kosalisa bango bázala na kondima makasi. Tozali na kondima ete libongoli oyo ya sika ekosalisa basakoli báteya bato oyo basalelaka elobeli ya bababa ya Argentine mpo bákóma baninga ya Yehova.​—Misala 13:48.