Betele ya Batatoli ya Yehova ya Argentine, na Buenos Aires, efungolaki musée ya sika na mokolo ya 11/12/2019. Musée yango elobeli mitó ya makambo mibale: Ya liboso, “mekolá kondima na bango” mpe ya mibale, “liloba na yo ekoumela seko.”

“Mekolá kondima na bango” ezali kolobela lisolo ya Batatoli ya Yehova na Argentine mpe na Uruguay. Mosala yango ebandaki na bamboka yango soki na bambula ya 1920, na ntango wana Batatoli bazalaki moke mpenza, mpe ezali komonisa ndenge motángo na bango emati mpenza lelo oyo. Esika ya spesiale elobeli lisolo ya bandeko na biso na bambula oyo mosala ya kosakola epekisamaki na Argentine. Ezali komonisa ndenge bazalaki kobengana bana ya Batatoli ya Yehova na kelasi mpe ndenge batyaki bankama ya bilenge Batatoli na bolɔkɔ na boumeli ya bambula mingi mpo baboyaki kokende na mosala ya soda. Babɛtaki mpe banyokolaki bilenge mingi kati na bilenge yango ya sembo, kutu misato mobimba bakufaki mpo na kondima na bango.

“Liloba na yo ekoumela seko” ezali na Babiblia mpe ezali kolobela makambo ya ntina oyo emonisi milende oyo esalemaki na boumeli ya basiɛklɛ mpo na kobongola Biblia na monɔkɔ ya Espagnol. Babiblia yango ezali 47, na kati na yango ezali na Babiblia oyo emonanaka mingi te mpe oyo ezali na ntina mingi, na ndakisa Biblia ya Ferrara oyo ebimaki na 1630. Yango ezali Biblia ya liboso oyo ebongolaki Makomami ya Ebre nyonso na Espagnol; mpe ezali na nkombo ya Nzambe na lokasa ya liboso. Lisusu, ezali na Biblia ya Reina-Valera, ebimeli ya liboso mpenza oyo ebimaki na 1602. Libongoli yango esaleli nkombo ya Nzambe, Yehova, na Testama ya Kala mobimba. Biblia ya Reina-Valera ezali Biblia ya monɔkɔ ya Espagnol oyo bato basalelaka mingi mpenza.

Lokola bato mingi bautá bamboka mosusu bayá na Argentine banda kala mpenza, ezali mpe na Babiblia ya minɔkɔ oyo bato yango bazalaki koloba ntango bakómaki na Argentine na si<u511>kl<u511> ya 19. Bato oyo bazali koya na musée yango bakoki komona Babiblia na monɔkɔ ya Allemand, ya Arménien, ya Croate, ya Ebre, ya Gaélique, ya Gallois, ya Hongrois, ya Irlandais, ya Italien, ya Anglais, mpe ya Portugais.

Na kati ya Babiblia yango ezali mpe na Babiblia oyo ebongolamaki na Argentine na 1919, na ndakisa Nuevo Testamento ya Pablo Besson, mpe Babiblia na minɔkɔ ya Ba-Amérindien ya mikolo oyo, na ndakisa Chorote, Mapudungún, Mocoví, Pilagá, Toba del Oeste, Toba Qom, mpe Wichí.

Ndeko Timoteo Costantino, oyo asalaka na Betele ya Argentine, alobi boye: “Tozali kopesa matɔndi na bato nyonso oyo bapesaki Babiblia oyo mpo tótya yango awa. Bato nyonso oyo bayaki kotala musée oyo, ezala bato ya Argentine to bato oyo bauti na bamboka mosusu, bayekoli makambo mingi oyo etali lisolo ya Biblia mpe ya Batatoli ya Yehova na Argentine mpe Uruguay.”