Batatoli ya Yehova bakoki kosambela na bosomi nyonso na ekólo Arménie mpe kokoba misala na bango kozanga bipekiseli mosusu. Bazwaki mokanda oyo emonisi ete losambo na bango endimami na Leta na sanza ya 10/2004.

Tii na sanza ya 10/2013, mokakatano eleki monene oyo Batatoli ya Yehova bakutanaki na yango na Arménie yango oyo: bakokaki te kosala mosala mosusu oyo bato oyo bazali basoda te bazalaki kosala, mpo basoda nde bazalaki kokamba mosala yango mpe ezalaki mpasi. Banda 1993, bankama ya bilenge mibali oyo baboyaki mosala ya soda mpo na kotosa lisosoli na bango bakangamaki na bolɔkɔ mikolo mingi, mpe basusu bayikelaki minyoko mpiko. Nsukansuka, na mokolo ya 8/06/2013, Arménie eyokanisaki mobeko na yango na mibeko ya Mpoto oyo emonisi ete soki moto alingi mosala ya soda te akoki kosala mosala mosusu. Na mokolo ya 23/10/2013, Commission républicaine d’Arménie epesaki nzela ete Batatoli ya Yehova 57 oyo bazalaki bato ya liboso oyo basɛngaki bápesa bango mosala mosusu na esika ya mosala ya soda. Mosala yango ya sika elongaki mpenza, mpo epesaki bango nzela ya kosalela ekólo na bango wana bazali kobatela lisosoli malamu.

Atako mbongwana monene esalemi, Batatoli ya Yehova bazali kaka konyokwama. Na bingumba mosusu, bazali koboya kopesa nzela ete Bandako ya losambo etongama, bakonzi bazali kosɛnga mbongo mingi mpo mikanda na bango ekɔta na mboka, mpe banguna bazali kopanza bansango ya lokuta mpo na bango na baradio to na batelevizyo to bongo na bongo. Batatoli ya Yehova bamonaki malamu bámema likambo yango na batribinale ya ekólo mpe ya mikili mosusu mpo na kozwa solisyo na likambo yango.