Na Australie, mɔtɔ ezali kaka kokoba kozikisa bazamba, mpamba te na mbula oyo molunge ezali makasi mpe mai ekauki mingi mpenza. Banda na sanza ya 09/2019, mɔtɔ ya makasi mpenza ezali kozikisa bazamba na bitúká nyonso ya Australie. Mɔtɔ yango euti kaka kobanda, kasi mbala oyo ekozala mabe mingi mpenza. Mɔtɔ ya makasi mpenza ezali na bokula mpe na epai ya sudi, na Victoria mpe na Nouvelle-Galles du Sud.

Toyoki nsango te ete bandeko na biso bakufi to bazoki, kasi bandako ya bandeko ebebi makasi mpe mosusu ebukani; bandako 9 kutu ebebi mpenza nyonso nyɛɛ. Kino sikoyo, bandeko koleka 700 balongwe na bandako na bango. Bandeko mingi bazwi ekateli ya kotika bandako na bango mpo na milinga. Bato ya mayele balobi ete mopɛpɛ ebebi makasi mpenza, ebebá naino boye te liboso, mpe kopema yango ekómi likama mingi mpenza. Bandeko mingi oyo batiki bandako na bango basepeli kofanda epai ya bandeko ya mabota na bango, baninga na bango to epai ya basakoli mosusu na masangá ya zingazinga, na esika oyo mɔtɔ yango ezali te.

Filiale ya Australie esali komite mibale mpo na kolendisa bandeko na Biblia mpe kopesa bango biloko oyo basengeli na yango. Bakɛngɛli mibale ya zongazonga mpe bandeko ya Komite ya filiale bazali kolendisa mpe kobɔndisa bandeko na esika makama yango esalemi. Atako bandeko oyo bafandaka esika mɔtɔ ezikisi bazamba balɛmbi nzoto, mpe bazali komitungisa, bamosusu balobi ete basepeli mingi mpenza na bolingo ya solosolo oyo bandeko bazali kokoba komonisela bango.​—1 Petro 2:17.