Tribinale monene ya Mpoto oyo etalelaka ntomo ya moto (CEDH) elongisaki Batatoli ya Yehova mbala mibale na likambo etali bonsomi ya losambo na Azerbaïdjan. Tozali na elikya ete Tribinale monene ya Mpoto oyo etalelaka ntomo ya moto ekosalisa bandeko na biso bázwa lisusu bonsomi ya losambo na mboka mobimba.

Na mokolo ya 20/02/2020, tribinale ekataki makambo ya ndeko Nasirov mpe bandeko mosusu oyo bazalaki kosamba ná ekólo Azerbaïdjan, makambo oyo bazalaki kozela banda 2010 mpe likambo etali makambo ya losambo ya lisangá ya Batatoli ya Yehova oyo bazalaki kosamba ná ekólo Azerbaïdjan, makambo oyo bazalaki kozela banda 2009. Na likambo ya ndeko Nasirov, tribinale elobaki ete Azerbaïdjan ebukaki artikle 5 mpe 9 (Bonsomi ya moto mpe bonsomi ya losambo) ya Convention européenne des droits de l’homme na ndenge ezalaki kokanga Batatoli ya Yehova mbala na mbala, kosambisa bango ntango nyonso, mpe kofutisa bango lomande mpo bazali kosala losambo na bango banda 2010. Tribinale elobaki ete esengeli kofuta Motatoli ya Yehova mokomoko oyo banyokolaki dolare 3 236, elingi koloba Azerbaïdjan esengeli kofuta Batatoli ya Yehova yango dolare 22 651. Na likambo etali makambo ya losambo ya lisangá ya Batatoli ya Yehova, tribinale elobaki ete Azerbaïdjan ebukaki artikle 10 (Bonsomi ya koloba) ya Convention yango na ndenge epekisaki bandeko bákɔtisa mikanda na biso mpe bákabolela bato yango.

Jason Wise, avoka moko oyo azalaki na tribinale, alobi boye: “Na boumeli ya bambula mingi, Batatoli ya Yehova na Azerbaïdjan bazalaki na mikakatano mpo na kokɔtisa mikanda na bango oyo elimbolaka Biblia mpe kokabolela bato. Tokɔtisaki badosye mingi na tribinale mpo bálongola bipekiseli oyo batyaki mpo mikanda na biso ekɔta na mboka. Tokɔtisaki badosye mingi na tribinale mpo guvɛrnema ezalaki kokanga Batatoli ya Yehova oyo bazali kosakwela bato mosusu. Tribinale monene ya Mpoto oyo etalelaka ntomo ya moto (CEDH) ezali na dosye mibale oyo ezali na ntina mpo na Batatoli ya Yehova na Azerbaïdjan. Na likambo etali makambo ya losambo ya lisangá ya Batatoli ya Yehova, tribinale monene yango elobaki ete mikanda ya Batatoli ya Yehova ekɔtisaka mobulu te kati ya mangomba to etindaka bato te básala mabe. Na Nasirov, tribinale elobaki ete mikanda ya Batatoli ya Yehova ekoki kokabolama na bisika nyonso epai ya bato oyo bazali Batatoli ya Yehova te. Tozali na esengo ndenge tribinale elongisi bonsomi ya losambo mpe ya koloba na Azerbaïdjan.”

Ndeko Famil Nasirov amonisi ndenge azali komiyoka: “Na kala, tozalaki na mikakatano mingi na mboka na biso. Bapolisi bazalaki kokanga biso ndenge balingi mpe kotunatuna biso mituna na boumeli ya ngonga 4 to 5. Kasi na lisalisi ya Yehova mpe milende ya bandeko na biso ya bolingo, likambo yango esalemi lisusu te mpe tokoki sikoyo kosakola lisusu mingi na bonsomi nyonso.”

Ata liboso Tribinale monene ya Mpoto oyo etalelaka ntomo ya moto (CEDH) ekata likambo yango, bandeko na biso bazalaki na bonsomi ya kosala losambo na Azerbaïdjan. Guvɛrnema epesaki bandeko na biso nzela ya kokɔtisa mikanda mpe kokabolela yango bato. Bafutisaki ata ndeko na biso moko te lomande mpo akendaki makita banda na sanza ya 01/2017. Lelo oyo, makita ezali kosalema na Bandako ya Bokonzi misato na Baku, ata mpe na bandako ya bato na bisika mosusu ya ekólo yango. Banda 2015, guvɛrnema ya Azerbaïdjan epesá nzela ete Batatoli ya Yehova básalaka Ekaniseli ya liwa ya Kristo, mayangani ya etúká mpe mayangani ya mike na bisika ya kofutela.

Tozali kotɔnda Yehova mpo na ndenge asali ete tózwa elonga wana na tribinale mpe na ndenge azali kokoba kosalisa bandeko na biso na Azerbaïdjan.​—Nzembo 98:1.