Na mokolo ya 16/04/2018, Tribinale monene ya Azerbaïdjan endimaki ekateli oyo tribinale ya moke ezwaki ya kofuta Irina Zakharchenko ná Valida Jabrayilova mbongo mpo batyaki bango na bolɔkɔ kaka mpamba na boumeli ya sanza 11. Liboso, na sanza ya 02/2017, tribinale monene elobaki ete basi yango basalaki mabe moko te ndenge bakabolaki mikanda oyo elobelaka makambo ya Nzambe kozanga ndingisa ya Leta. Kasi, tribinale monene etikaki mokumba ya kofuta basi yango na mabɔkɔ ya batribinale ya basivile.

Nsima ya kolongola bifundeli nyonso oyo bafundaki Zakharchenko ná Jabrayilova, oyo bazali Batatoli ya Yehova, basɛngaki batribinale ya basivile ete efuta bango ndenge banyokolaki bango kaka mpamba. Na sanza ya 08/2017, tribinale moko ya etúká endimaki báfuta bango kasi ministère ya Finances ememaki lisusu likambo yango na tribinale. Na sanza ya 11/2017, tribinale ya cours d’appel endimaki ekateli oyo tribinale ya etúká ezwaki. Ministère yango eboyaki lisusu ekateli yango mpe ememaki lisusu likambo yango na tribinale monene na sanza ya 02/2018. Tribinale monene eboyaki efundeli ya ministère yango mpe elongolaki te ekateli oyo ezwamaki liboso ya kofuta basi yango mibale.

Longolá kondima ete báfuta basi yango, Tribinale monene endimaki mpe ete bakonzi banyokolaki mpenza Zakharchenko ná Jabrayilova mpo balekisaki ndelo na bokonzi na bango mpe batosaki te ntomo ya basi wana oyo basalaki mabe moko te.