Mokolo ya 31/05/2018, Tribinale monene ya Canada etalelaki likambo ya Highwood Congregation of Jehovah’s Witnesses (Judicial Committee) v. Wall, mpe ezwaki ekateli na bomoko ete ‘Mangomba ezali na bonsomi ya kopona nani asengeli kozala mosangani na yango mpe kotya mibeko mpo na basangani na yango.’ Endimi ete kolongolama ya moto na lisangá ezali te likambo oyo esengeli kotalelama na bazuzi ya tribinale.

Tribinale esukisaki na koloba ete malako ya Batatoli ya Yehova mpo na kotalela soki lisumu monene esalemaki “ezali te mpo na konyokola to kotungisa moto, kasi ezali nde mpo na kosalisa ye azonga na lisangá,” mpe ekataki ete batribinale esengeli te kokɔta na makambo ya lingomba oyo etali moto na moto.

Mpo na kolimbola bantina ya ekateli yango, Malcolm Rowe, zuzi na Tribinale monene oyo azwaki maloba na nkombo ya bazuzi 9 oyo basambisaki likambo yango, alobaki boye: “Ekómaka ete mibeko mpe ndenge ya kosalela makambo ya lingomba moko esɛnga mpe kolimbola bindimeli ya lingomba yango, lokola na likambo ya kolongola moto na lisangá. Batribinale ezali na lotomo te to ezali na mibeko te oyo esengeli mpo na kokata matata oyo ekoki kobima mpo na bindimeli ya lingomba moko.”

Philip Brumley, mopesi-toli ya Batatoli ya Yehova na makambo ya mibeko alobi: “Na nzela ya ekateli oyo, Tribinale monene ya Canada ekokani na batribinale minene ya bikolo lokola Argentine, Brésil, Hongrie, Irlande, Italie, Pérou, Pologne, mpe ya États-Unis oyo bandimá ete mibeko epesi biso lotomo ya kosalela Biblia mpo na koloba nani asengeli to te kozala Motatoli ya Yehova.”​—1 Bakorinti 5:11; 2 Yoane 9-11.