Na sanza ya 07/2019, musée moko ya sika ya Biblia efungwamaki na filiale ya Batatoli ya Yehova na Scandinavie, ezali na engumba Holbæk, na Danemark, na ntaka ya kilomɛtrɛ soki 65 uta na Copenhagen. Motó ya likambo ya musée yango ezali “Biblia mpe nkombo ya Nzambe na Scandinavie.”

Na Musée yango, basangisi esika moko biloko oyo emonanaka mpenza te ná Babiblia ya ntina mingi na monɔkɔ ya Danois, ya Faeroe, ya Groënland, ya Islandais, ya Norvegien, ya Saami, mpe ya Swedois. Batye Babiblia koleka 50 na musée yango.

Moko ya Babiblia oyo eleki ntina ezali Biblia ya kala ya 1541 ya Gustav Vasa. Ezalaki Biblia ya mobimba oyo babimisaki na minɔkɔ nyonso ya Scandinavie. Biblia ya Gustav Vasa ekómaki libongoli oyo bato bazalaki kosalela mingi na monɔkɔ ya Swedois, oyo etosaki gramɛrɛ mpe ezalaki na maloba mingi. Ekómaki mpe makomi ya sika mpo na Biblia na monɔkɔ ya Swedois na boumeli ya mbula 300 oyo elandaki.

Biblia ya 1550 Christian III ezali mpe moko ya Babiblia ya kala oyo emonanaka lisusu te etyami na musée yango. Oyo ezalaki Biblia ya liboso na monɔkɔ ya Danois na mobimba na yango. Biblia Christian III esalisaki mpo na kosalela maloba ya monɔkɔ ya Danois, mpe ezalaki na ntina mingi na eteni monene na nɔrdi ya Mpoto.

Erik Jørgensen ya filiale ya Scandinavie alobi boye: “Musée oyo ya sika ya Biblia ezali komonisa ndenge bato ya Scandinavie na boumeli ya siɛklɛ mingi bazalaki na limemya makasi mpo na Liloba ya Nzambe mpe nkombo na ye oyo eleki monene, Yehova.”