Lokola maladi mabe ya coronavirus oyo ezali se kopalangana, bandeko na biso na mokili mobimba bazali kaka kozwa ndenge ya kosakola. Na ekólo Équateur, basakoli bazali kosalela mayele ndenge na ndenge mpo na kosakola.

Na engumba Ambato, mosakoli moko ya mwasi ya mbula nsambo ná mama ye bazalaki kotindela balakisi ya mwana yango mikanda. Mikanda mosusu ezalaki koloba boye: “Mbote madame! Nazali kokomela yo mpo na kotindela yo nsango moko ya kobɔndisa na ntango oyo ya mpasi tozali na yango. Na Emoniseli 21:4, Biblia ezali kopesa biso elikya ya malamu mpenza mpo na mikolo ezali koya. Nazali kotindela yo mpe esika okoki kozwa makambo ming.”

Madame moko azongisaki boye: “Mersi mingi mpenza mwana na ngai. Atako ozali mwana moke, maloba na yo ezali na bwanya mingi.” Madame mosusu apesaki ye mersi mpe atunaki ye soki akoki kozwa na Internet buku Mokanda ya masolo ya Biblia. Madame yango alobaki ete azaláká na buku wana mpe apesá yango mwana-kelasi moko boye. Elenge mosakoli yango ayebisaki madame yango ete akoki kozwa buku yango na jw.org.

Mwasi moko ná mobali na ye bafandaka na engumba Quevedo, balukaki bankombo ya bato na telefone na bango mpo na kozwa bato oyo bazali Batatoli ya Yehova te mpe batindelaki bango mokanda na maloba oyo: “Nazali Motatoli ya Yehova. Lokola maladi mabe oyo ezali kotungisa na mboka na biso mpe na mokili mobimba, tozali na likoki ya kokende kosakola ndako na ndako te, kasi tozali mpenza na mposa ya kosolola na yo na nzela ya video na Internet.”

Bato ebele basepelaki kosolola na bango na nzela ya video na Internet. Mwasi moko oyo bakomelaki, azaláká kolinga te ete Batatoli ya Yehova básolola na ye, apesaki bango longonya mpo na likanisi na bango ya kobɔndisa bato. Mwasi yango alobaki ete, maladi mabe oyo ezali kotungisa makanisi na ye mingi mpenza. Bandeko wana batindelaki mwasi yango Lamuká! No. 1 2020, oyo ezali na motó ya likambo “Okoki kolonga kotungisama,” na PDF. Na lisolo mosusu, mwasi yango apesaki bango matɔndi mingi mpe ayebisaki bango ete, atángá yango mbala ebele mpenza.

Ndeko moko na nkombo Johana, azali baba, afandaka na etúká ya Santo Domingo de los Tsáchilas, “akomaki” na kosaleláká mayemi. a Na nsima akangaki liyemi yango fɔtɔ mpe atindelaki yango bato nyonso oyo asololaka na bango oyo bazali bababa. Nzokande, moko na basi oyo ye atindelaki mokanda yango alobaka. Na mbala moko mwasi yango akomaki mokanda mpe atunaki mituna. Lokola ndeko Johana akangaki ntina ya mituna yango te, ndeko mwasi moko oyo azali mobongisi-nzela, oyo alobaka, nkombo na ye Rhonda apesaki biyano na mituna yango.

Mwasi yango alobaki ete ayebisaki ndeko Rhonda ete, mayemi oyo ndeko Johana atindelaki ye etindaki ye akanisa. Atuni soki ezali na vɛrsɛ moko na Biblia oyo ezali kolobela makambo oyo ezali kosalema na mokili lelo. Ndeko Rhonda atángelaki ye Luka 21:10, 11 mpe atindelaki ye ndenge akoki kozwa video Mpo na nini Nzambe atiki nzela na bampasi? mpe Mpo na nini Nzambe akelaki mabele? Mwasi yango alingi ete básolola lisusu.

Kaka ndenge ntoma Paulo akobaki ‘kopesa litatoli malamumalamu mpo na Bokonzi ya Nzambe’ ntango azalaki na bolɔkɔ, bandeko na biso bazali kokoba kosala oyo bakoki mpo na kosakola, atako bakoki kobima te na bandako na bango.​—Misala 28:23.