Na mokolo ya 24/08/2021, Batatoli ya Yehova bazwi bolongi na tribinale ya Équateur. Tribinale oyo etalelaka mibeko ya mboka elobaki ete bato ya mboka yango bazalaki te kotosa ntomo ya losambo na San Juan de Ilumán ya etúká Imbabura. Tribinale etyaki mobeko ete moto nyonso na Équateur azali na bonsomi ya kosala losambo na ye, mingimingi bato oyo bafandaka na bamboka ya kati, mpe ezali mobeko moko ya ntina mingi oyo ekoki mpe kosalelama na ekólo mosusu.

Na mobu 2014, bakonzi ya etúká moko bakɔtaki na makasi na lopango moko oyo Batatoli ya Yehova basombaki mpo na kopekisa bango bátonga Ndako ya Bokonzi. Bapekisaki mpe bandeko na biso bayanganaka elongo mpo na losambo mpe kosakola ndako na ndako. Bandeko na biso bamemaki likambo yango na tribinale. Kasi, bazuzi mibale ya mboka yango balongisaki Batatoli te, yango wana, balobaki ete likambo yango ebukaki lotomo na bango na tribinale.

Nsima ya kosala nyonso oyo bakoki na batribinale ya mboka, bandeko bamemaki likambo yango na tribinale ya monene ya ekólo. Tribinale monene ekweisaki tribinale moke ete ezali kotosa te lotomo ya Batatoli ya Yehova ya kosala losambo na bango na bonsomi. Bakonzi ya engumba mpe bazuzi oyo bazalaki kolandela likambo yango, bayebisaki bango ete basengeli kotosa bibongiseli ya mangomba mpe ya mimeseno. Longola yango, basɛngaki bakonzi ya engumba yango bábatela “likambo etali kofanda na kimya kati na mangomba ekeseni mpe mimeseno ya bato ya ndenge na ndenge” mingimingi na oyo etali misala ya Batatoli ya Yehova.

Philip Brumley, avocat général ya Batatoli ya Yehova alobi boye: “Tondimi ete lotomo ya bana-mboka ezali lokola nguba mpo na kobatela mimeseno ya bana-mboka, kasi ekozala malamu te kobongola nguba yango mpo ekóma mopanga oyo ekoki kobebisa ntomo ya libosoliboso ya bana-mboka.”

Batatoli ya Yehova oyo bafandaka na San Juan de Ilumán bazali na botɔndi mpo na ekateli oyo tribinale ezwaki.

Tozali na esengo ya komona “lobɔkɔ ya Yehova” ntango bandeko na biso bazali kozwa matomba na bolongi oyo bazwaki na tribinale oyo ezali kobatela bonsomi ya losambo na biso.​—Masese 21:1.