Mopɛpɛ makasi babengi Dorian, oyo eumelaki banda mokolo ya 01/09/2019 tii mokolo ya 03/09/2019, esasaki mpenza Bahamas nde kosasa. Ata liboso mopɛpɛ ebanda koleka na Bahamas, filiale ya États-Unis ebandaki kobongisa biloko ya lisungi na Floride, États-Unis. Ntango kaka likama ezalaki lisusu te mpo na kosala mobembo, bandeko oyo bazali na bamasuwa mpe bampɛpɔ babandaki mosala. Bazalaki na kati ya bato oyo bakómaki liboso na bisanga yango mpo na kosalisa.

Bandeko 13 oyo bazali na bampɛpɔ basalaki mibembo mbala koleka 300 mpo na kokende kotika tɔni 15 ya biloko ya lisungi, mpe bandeko koleka 700 oyo bamipesaki na bolingo na bango moko bakendaki mpo na kosalisa na bisika oyo mopɛpɛ esasaki. Lisusu, masuwa 13 ya bandeko esalelamaki mpo na komema biloko soki tɔni 90. Kolongwa Floride kokende Bahamas mpe kozonga ezwaka moi mobimba.

Jose Cabrera, mokonzi ya libándá moko ya mpɛpɔ na Floride [Palm Beach International Airport ] alobi boye: “Ntango kaka mopɛpɛ esilaki, bampɛpɔ ya [Batatoli ya Yehova] ebandaki kokende na Bahamas, etondaki na biloko, bakendaki kosalisa. Bazali mpenza ndakisa malamu mpo bazali kosalisa bato koleka ndenge moto akoki kokanisa.”

Ndeko Glenn Sanders, moko ya bandeko oyo bayaki na bampɛpɔ na bango na bolingo na bango moko, alobi boye: “Mpo na mingi na biso, ezali mbala ya liboso tósalela makoki na biso mpo na kosalisa bandeko na biso. Tosepelaki mingi na koyeba ete tozali mwa enama moke ya nzoto oyo ezali kosalisa enama mosusu oyo ezali konyokwama.”​—1 Bakorinti 12:26.

Filiale ya États-Unis elobi ete, biloko nyonso bandeko bamemaki na milende ekoki kokóma na mbongo soki dolare 1 750 000 mpe mosala yango esilaki na mokolo ya 01/05/2020.