Joseph Rutherford, oyo azalaki prezida ya la Societe Watch Tower, azalaki wana ntango babandaki kotonga Ndako ya Bokonzi oyo ezalaki na balabala ya Pensacota 1228, na etúká ya Honolulu na Hawaii. Ezalaki na mobu 1935. Ndako yango ya moke ezalaki ndako ya liboso na mokili mobimba oyo ebengamaki “Ndako ya Bokonzi.” Eleki sikoyo mbula koleka 85, bato mingi bakómaki kosambela Yehova na Ndako ya Bokonzi yango. Lelo masangá minei na minɔkɔ mitano bakisa mpe ná monɔkɔ ya Pidjin ya Hawaii esalaka makita na Ndako ya Bokonzi yango. a

Liboso ete maladi ya coronavirus ebanda, na mokolo ya 11 tii 15/02/2020, bandeko na biso babengisaki bato ya mboka na bango, bakonzi ya mboka mpe balakisi báya kotala ndenge babongisi Ndako ya Bokonzi yango. Batambwisaki bato oyo bayaki kotala na kati ya Ndako ya Bokonzi yango, mpe balakisaki bango bafɔtɔ etali Ndako ya Bokonzi, mpe balandaki diskur oyo elobeli mosala ya Batatoli ya Yehova. Na mokolo ya 16/02/2020, ndeko David Splane ya Lisangani ya Mikóló-Bakambi ya Batatoli ya Yehova, asalaki diskur ya bofungoli.

Ndeko moko ya mwasi oyo azalaki kopesa mabɔkɔ mpo na kobongisa programɛ ya molulu yango, alobi boye: “Atako mokano na biso ezalaki te ya kosakwela bato oyo tobengisaki, tomoni ete litatoli moko monene epesamaki epai ya bato oyo mbala mosusu bayoká naino te makambo etali Batatoli ya Yehova.”

Molulu yango esalisaki bandeko na biso báyeba lisusu malamu makambo ya kitoko etali Batatoli ya Yehova na esanga ya Hawaii mpe komona kokokisama ya maloba oyo: “Bakokumisa mpenza Yehova, na bisanga ya mbu, nkombo ya Yehova, Nzambe ya Yisraele.”​—Yis. 24:15.