Mbula ya mopɛpɛ makasi oyo babengi Florence ezindisaki eteni monene ya nɔrdi ya Californie, sudi ya Californie mpe bitúká mosusu. Liboso, mopɛpɛ makasi Florence ebomaki bato soki 32 mpe ebele ya bato mosusu basundolaki bandako na bango.

Filiale ya États-Unis emonisi ete mosakoli ata moko te akufaki to azokaki makasi na mopɛpɛ yango, atako esɛngaki ete Batatoli ya Yehova koleka 4 000 bálongwa na bandako na bango. Atako makambo ekómi kobonga, kasi bisika mosusu mai ezali kaka mingi mpe mwaye ya kokóma kuna ezali te. Lapolo oyo tozali na yango sikoyo emonisi ete mopɛpɛ yango ebebisaki bandako 351 ya bandeko na biso mpe Bandako ya Bokonzi 21.

Komite ya kopesa lisungi ezali kobongisa mosala ya kopesa bilei, mai, bilamba, bisika ya kolala mpe mwa lisalisi ya monganga mpo na bandeko oyo bazwi likama. Ezali na ekipi mibale ya bandeko oyo bazali kosunga na kolongola banzete oyo ekweaki. Lokola mbula yango ya mopɛpɛ makasi esili mpe bandeko bazwi lisungi oyo bazalaki na yango mposa, likambo monene oyo etikali ezali ya kobongisa biloko oyo mopɛpɛ yango ebebisaki. Mpo na kosalisa na likambo yango, bavolontɛrɛ ya masangá ya zingazinga mpe bandeko ya bisika mosusu oyo babengisami mpo na kopesa lisungi bazali koya mpe bakosala misala yango na nse ya litambwisi ya komite ya kopesa lisungi. Bankulutu mpe bakɛngɛli ya zongazonga bazali kotala bandeko oyo bazwi likama mpo na kolendisa bango.

Tozali kobondela mpo na bandeko na biso oyo bakutani na makambo ya mpasi mpo na mopɛpɛ oyo euti kobɛta mpe tozali kozela ntango oyo tokoyoka “nsɔmɔ te.”​—Yisaya 12:2.