Maladi mabe ya COVID-19 ebimisi mikakatano ya sika mpo na babiro ya kobongola mikanda (RTO) 11 oyo ezali na Inde, oyo ezali kobongola mikanda na minɔkɔ 36. Na lisalisi ya Yehova, baekipi ya kobongola mikanda yango elongi mikakatano yango mpe ekobi mosala na yango.

Mpo na kobongola mikanda na biso, babongoli basengeli kosala esika moko. Kasi lokola COVID-19 ezalaki kopalangana, bakonzi ya ekólo Inde bapekisaki bato kobima, mpe ezalaki mpasi mpo babongoli bákutana esika moko. Lisusu, bandeko oyo bakambaka misala ya kokɔtisa mingongo mpe kosala bavideo bazalaki lisusu na likoki te ya kosala yango na ba-RTO.

Na babiro na yango, na esika bandeko bákutana esika moko mpo na kobongola, bakómaki nde kosala na nzela ya video, mpe bazalaki kokɔtisa mingongo na mosika. Mayele yango esalisaki bandeko oyo babongolaka mikanda bákoba kozwa lisalisi ya bandeko na bamboka mosusu, na ndakisa na Bangladesh mpe na États-Unis.

Bandeko bazwaki mpe mayele ya kosala bavideo ya elobeli ya bababa wana moto na moto azali mosika. Babongoli mosusu bakómisaki bashambrɛ na bango bisika ya kokɔtisa mingongo, batye batelefone na bango likoló ya bakartɔ mpo ezala lokola bakamera ya kitokokitoko oyo bazalaka na yango na ba-stidio na bango.

Longola yango, bandeko oyo bazali kobongola mikanda na biro yango bazali kotyela Yehova motema mobimba ete asalisa bango bázala kaka na makanisi malamu, mpe bákoba na mosala na ntango oyo ya mpasi. Talá makambo basusu kati na bango balobi:

Ndeko Jose Francis oyo azali na Kolkata alobi boye: “Ntango likambo ebimi, bato bamonaka nde mikakatano, kasi Yehova ye amonaka nde ndenge ya kosilisa yango.”

Ndeko mwasi Bindu Rani Chandan na Bangalore alobi boye: “Koyeba ete Yehova azali kosalela ngai na ntango oyo ya mpasi ezali kopesa ngai esengo mingi atako tozali na mikakatano.”

Ndeko mwasi Rubina Patel na Vadodara abimisi mayoki na ye na maloba oyo: “Eloko moko te ekoki kopekisa Yehova ná ebongiseli na ye, ezala ata coronavirus.”

Tozali mpenza kosepela na bandeko na biso oyo bazali kosala na molende mosala ya kobongola mikanda. Tondimi na motema moko ete elimo santu ya Yehova ezali kosalisa bango bálonga, mpe elimo yango ekosala ete esakweli oyo ya Yesu ekokisama: “Nsango malamu oyo ya bokonzi ekosakolama na mabele mobimba esika bato bafandi mpo ezala litatoli na bikólo nyonso.”​—Matai 24:14.