Na mokolo ya 16/03/2019, mbula makasi ebɛtaki na ɛsti ya etúká ya Papua, na Indonésie. Mai ya mbula etondaki mpenza, ebomaki bato koleka 100 mpe ezindisaki bandako ebele.

Filiale ya Indonésie elobi ete bandeko na biso mingi oyo bafandaka na engumba Sentani, oyo ezali na etúká ya Papua, bakutanaki na likama yango. Likambo ya mawa, ndeko na biso moko akufaki ntango mpela ezindisaki ndako na ye. Bandako 3 ya mabota ya Batatoli ya Yehova ebebaki mpenza. Bandeko koleka 40 batikaki bandako na bango, mpe sikoyo mingi na bango bazali kofanda epai ya bandeko mosusu ya mboka yango. Komite ya kopesa lisungi etyamaki mpo na kopesa bandeko yango lisungi. Bamonisi ya filiale, elongo na mokɛngɛli ya zongazonga, bakendaki kotala bandeko yango mpo na kolendisa bango na elimo. Bazali kotalela makambo oyo bakoki kosala mpo na kosalisa mpe kopesa bango lisungi oyo basengeli na yango.

Tozali kobondela mpo na bandeko na biso nyonso oyo bazali kokutana na makama. Tozali kozela na mposa makasi mokolo oyo Yehova “akolongola mpenza liwa mpo na libela” mpe “akopangwisa mpenza mpisoli na bilongi nyonso.”​—Yisaya 25:8.