Tribinale moko ya monene (Cour d’appel) na engumba Milan, na Italie, euti kozwa ekateli moko mpo na ntomo oyo mwasi moko ná mobali na ye oyo bazali Batatoli ya Yehova bazali na yango likoló ya mwana na bango, na likambo etali lisalisi ya minganga. Ekateli oyo ekosalisa mpo na komonisa batribinale polele ete bakoki kotya ntembe te na ntomo oyo baboti bazali na yango ya kozwa bikateli ya malamu mpo na bana na bango kaka mpo baboti basɛngi ete minganga bátya bana na bango makila te ntango bazali kosalisa bango. Tribinale yango emonisi ete baboti bazali na lotomo ya koboya ete minganga bátya bana na bango makila mpo na bindimeli ya baboti na bango.

Na sanza ya 09/2019, mwasi moko ná mobali na ye oyo bazali Batatoli ya Yehova bamemaki mwana na bango ya mwasi ya sanza zomi epai monganga mpo azokaki nsima ya kokwea. Minganga bamonaki ete esengeli básala ye lipaso mpo azokaki na kati ya motó. Minganga basalaki lipaso yango malamu, batyaki ye makila te.

Na nsima, atako mwana abandaki koyoka malamu mpe azalaki lisusu na likama te, monganga asɛngaki baboti na ye ndingisa ete bátya ye makila mpo na kobatela ye. Baboti basɛngaki ete básalela nkisi mosusu kasi bátya ye makila te.

Na esika ete monganga yango alanda likanisi ya baboti, abengaki bapolisi mpe biro ya prokirɛrɛ. Biro ya prokirɛrɛ ezwaki mitindo uta na tribinale oyo etalelaka makambo ya mabota. Tribinale oyo etalelaka makambo ya mabota elobaki ete baboti bazali na ntomo nyonso te likoló ya bana na bango na likambo etali lisalisi ya minganga, kasi elobaki ete mokambi ya lopitalo nde azali na ntomo ya kotala lisalisi nini ebongi to te. Atako bongo, batyaki mwana yango makila te mpo minganga bamonaki ete ezali na ntina te bátya ye makila.

Likambo yango ebendaki likebi ya bapanzi-nsango na Italie mobimba. Bapanzi-nsango mingi na Italie bapesaki nsango ya lokuta ete ekateli ya tribinale moko ebikisi bomoi ya mwana mwasi moko mpo tribinale yango epesaki nzela bátya mwana yango makila.

Na mokolo ya 10/09/2020, tribinale ya monene (Cour d’appel) eboyaki ekateli ya tribinale oyo etalelaka makambo ya mabota oyo elongolaki ntomo oyo baboti bazali na yango likoló ya bana na bango. Tribinale ya monene emonisaki ete tribinale oyo etalelaka makambo ya mabota esengelaki te kopesa mitindo wana mpe ezali na likoki te ya kokata likambo ya ndenge wana.

Tribinale ya monene na Milan elobaki boye: “Baboti baboyaki kondima ete bátya bana na bango makila mpo bandimaka mpenza mateya ya losambo na bango. Kasi, yango emonisi te ete bazali baboti mabe mpe ete bakoki lisusu te kozwa bikateli likoló ya bana na bango.” Kaka na mbula oyo eleki, tribinale ya minene misato na Italie endimaki ete baboti oyo bazali Batatoli ya Yehova bazali na ntomo ya kosɛnga ete bátya bana na bango makila te ntango minganga bazali kosalisa bango.

Ezali na ntina mingi ete bazuzi mpe minganga báyeba ete Batatoli ya Yehova basalaka te makamwisi mpo na kobikisa bato ya maladi, mpe baboyaka te kokende na lopitalo. Yango wana, balukaka kozwa lisalisi ya malamu na balopitalo oyo minganga bayebi mosala malamu mpe bazali na bamasini oyo ebongi mpo na kosalisa bango malamu na ndenge oyo ekotosa bindimeli na bango. Basɛngaka minganga kaka ete bátya bango makila te ntango bazali kosalisa bango. Minganga ya malamu oyo bakambaka balopitalo ya minene na mokili mobimba bandimá likambo yango mpe bazali kosalisa Batatoli ya Yehova malamu, bazali kotya bango makila te.

Tozali kopesa batribinale wana matɔndi ndenge bazwi bikateli ya malamu oyo ekosalisa bandeko na biso wana bazali kosala nyonso mpo na kopona lisalisi ya minganga ya malamu mpo na bana na bango.​—Misala 15:29.