24 SANZA YA 4, 2017
JAPON
Batatoli ya Yehova bamipesaki lokola bavolontɛrɛ mpo na kobongisa bandako koleka 300 oyo koningana ya mabele ebebisaki na Japon
Batatoli ya Yehova bazali kobongisa plafɔ ya ndako moko na Koshi.
EBINA, Japon—Batatoli ya Yehova ya Japon basilisaki kobongisa bandako 348 ya bandeko oyo basambelaka na bango, oyo ebebaki na koningana ya mabele oyo esalemaki na engumba Kumamoto, na Japon, na mokolo ya 14 mpe 16/04/2016. Bavolontɛrɛ soki 15 000 bapesaki mabɔkɔ na mosala yango ya kotonga. Misala ya kopesa lisungi ebandaki na sanza ya 07/2016 mpe esengelaki kosila na sanza ya 03/2017.
Atako Motatoli ya Yehova moko te akufaki na koningana wana ya mabele, Batatoli ya Yehova soki 119 bakimaki bandako na bango. Bandeko yango bafandaki naino na Bandako ya Bokonzi 15, bisika ya losambo ya Batatoli ya Yehova ntango bavolontɛrɛ bazalaki kolongola basalite na bandako oyo ebebaki.
Ekipi ya bandeko motoba oyo bazali kotya nsamba ya sika na ndako moko oyo ebebaki na engumba ya Chimachi.
Kobanda mokolo ya 25/07/2016, Batatoli ya Yehova oyo bayebi kotonga bandako babongisaki bandako oyo esalaki banzela, pavema, bifelo, nsamba mpe batiyo ya mai na bandako oyo koningana ya mabele ebebisaki. Batyaki mpe baporte, bafenetre mpe baaparɛyi ya kopesa malili to molunge.
Bandeko oyo bazali kobongisa ndako moko oyo ebebaki na engumba ya Mashiki.
Minoru Kono, mokonzi moko ya kala ya Leta na makambo etali komibatela na Japon alandelaki misala ya kopesa lisungi oyo Batatoli ya Yehova basalaki; alobaki boye: “Na mosala na ngai, ezalaka na ntina kosala nokinoki mpo na kobikisa bomoi ya bato. Batatoli ya Yehova basalaki bongo nsima ya koningana ya mabele na Kumamoto mpo bayaki nokinoki na esika yango mpo na kosalisa baoyo bazwaki likama. Mpe ntango babandaki misala yango ya kopesa lisungi, nakamwaki ndenge namonaki bato oyo bayebi mpenza mosala ya kotonga bandako, oyo bautaki na Japon mobimba bayaki kopesa mabɔkɔ na mosala yango. Bavolontɛrɛ oyo basalaki misala yango bamipesaki mpenza mpe basalaki mosala makasi.”
Bavolontɛrɛ oyo bazali kolongola nsamba oyo ebebi mpe bazali kotya mosusu na Kikuchi.
Motatoli ya Yehova moko azali komema béton oyo ekosalisa mpo na kobongisa fondasyo ya ndako moko oyo ebebaki na Uki.
Ichiki Matsunaga, molobeli ya Batatoli ya Yehova na Japon, alobi boye: “Na boumeli ya mwa basanza oyo eleki, makambo ekómaki kobonga mokemoke nsima ya likama mpe totongaki lisusu bandako na biso elongo na bato mingi mosusu oyo koningana ya mabele na Kumamoto ebebisaki mpe bandako na bango. Lisungi ya solosolo oyo bandimi ya lingomba na biso bapesaki biso nsima ya likama oyo, ebɔndisi biso mpenza mpe epesi biso makasi.”
Bato oyo bapanzi-nsango bakoki kobenga:
Na mokili mobimba: David A. Semonian, Biro ya kozwa bansango, +1-845-524-3000
Japon: Ichiki Matsunaga, +81-46-233-0005