Libota mpe baninga ya Teymur Akhmedov bazali komitungisa mingi mpo na sante na ye. Akhmedov azali Motatoli ya Yehova mpe azali na mbula 61. Asali bambula mingi na maladi, mpe esali sikoyo mbula moko bandá akɔtá bolɔko. Na mokolo ya 8/2/2018 basalaki ye lipaso mpe balongolaki ye mbuma mibale oyo moko na yango ezalaki mabe mpenza. Bato ya libota mpe baavoka na ye basɛngaki bakonzi bábimisa ye na bolɔko mpo esika batyaki ye na bolɔko ezalaki malamu te mpo na sante na ye, mpe bazalaki komitungisa mpo esengelaki minganga bálandelaka sante na ye. Kasi bakipaki makambo oyo basengaki te.

Tribinale ya Kazakhstan ekatelaki Teymur Akhmedov mbula mitano ya bolɔko, etumbu yango ya bolɔko ekosila na 2022. Akhmedov asalaki likambo ya mabe te, bakangaki ye kaka mpo asalelaki lotomo oyo azali na yango ya kosambela na bonsomi. Batyaki kutu nkombo na ye na molɔngɔ ya bato oyo bakangá kɔnti na bango na banki, mpo bamoni lokola aza na boyokani na bateroriste. Tribinale ya Kazakhstan eboyaki kotalela lisusu likambo na ye.

Ebongiseli ya ONU oyo etalelaka makambo ya kokanga bato kaka mpamba eyebisaki guvɛrnema ya Kazakhstan etika Akhmedov mpe elongola bifundeli ya lokuta oyo bafundaki ye. Lisusu, komite ya ONU oyo etalelaka ntomo ya moto esɛngaki Kazakhstan ebimisa ye nokinoki na bolɔko mpo azali maladi.

Avoka ya Akhmedov alobaki boye: “Ezali kosɛnga bosembo esalema mpo na likambo ya Teymur oyo bakangá ye kaka mpamba mpo sante na ye ezali malamu te mpe azali na mposa ya lisalisi ya monganga. Ndenge kaka bibongiseli ya ONU esɛngaki, biso mpe tozali kosɛnga na bakonzi ya Kazakhstan bámonisa motema mawa mpe bábimisa Teymur na bolɔko.”