Komite ya ONU oyo etalelaka ntomo ya moto etalelaki nokinoki mokanda oyo batindelaki bango mokolo ya 3/01/2018, mpo na likambo ya Teymur Akhmedov. Bandá bakangá ye kaka mpamba elingi ekokisa sikoyo mbula mobimba; azali na mbula 61 mpe sante na ye ezali malamu te. Lokola tribinale ya Kazakhstan eboyaki bábimisa ye na bolɔkɔ mpe elongolaki te efundeli oyo bafundaki ye ete azalaki kosala makambo na ye ya losambo na ndenge oyo eyokani te na mibeko ya Leta, Akhmedov amemaki likambo yango na Komite ya ONU mpo na koluka lisalisi.

Na nsango oyo Komite yango etindaki mokolo ya 9/01/2018, esɛngaki Kazakhstan eluka ndenge mosusu ya kosala mpo na sante ya Akmedov, liboso kutu Komite yango ezwa ekateli na likambo oyo bakangaki ye. Esɛngaki bakonzi “básala nyonso ete Akhmedov azwa lisalisi ya monganga oyo esengeli mpe esika oyo batye ye na bolɔkɔ eyokana na mibeko ya [Pacte international relatif aux droits civils et politiques] eyokana mpe na mibeko ya bikólo mosusu.” Lisusu, nsango yango esɛngaki bakonzi ya Kazakhstan “bábimisa [ye] na bolɔkɔ mpo na sante na ye to bátye ye na ndako oyo bakɛngɛlaka ntango Komite yango ezalaki kotalela likambo oyo afundaki.”

Bosɛnga yango eyokani na oyo ebongiseli ya ONU oyo etalelaka makambo ya kokanga bato kaka mpamba elobaki na likambo etali sante ya Akhmedov. Na sanza ya 10/2017, ebongiseli yango etalelaki likambo oyo Akhmedov afundaki mpe elobaki ete bakangaki ye kaka mpamba mpe bakonzi ya Kazakhstan basengeli kobimisa ye na bolɔkɔ mpe kofuta ye mpo banyokoli ye kaka mpamba. Tii sikoyo, guvɛrnema ya Kazakhastan eboyi kokipe makambo oyo ebongiseli yango elobaki. Bakatelaki Akhmedov mbula mitano ya bolɔkɔ, kasi así asali pene na mbula mobimba.