LILONGWE, Malawi. Mokolo ya 3/05/2017, Aaron Mankhamba, oyo azali na mbula 18 mpe Hastings Mtambalika, oyo azali na mbula 15, bango nyonso bana ya Batatoli ya Yehova, bazongisaki bango lisusu na eteyelo ya Khombe nsima ya kobengana bango mpo baboyaki koyemba loyembo ya ekólo na molulu moko oyo esalemaki na eteyelo na bango. Banda mokolo ya 13/02/2017, bapekisaki bango kokɔta kelasi. Ntango baboti ya bana yango mpe bamonisi ya filiale ya Batatoli ya Yehova bakendaki kokutana na bakonzi ya eteyelo yango mpo na kosolola na bango, bandimaki kozongisa bana yango na eteyelo.

Na masolo yango, bamonisi ya filiale balobelaki makanisi oyo ezalaki na mikanda mibale oyo guvɛrnema ya Malawi ekomáká mpe balakisaki bakambi ya eteyelo mikanda yango. Mokanda ya liboso ezali ya 1997 mpe elobelaki Batatoli ya Yehova ya Malawi, epesaki bango ndingisa ya koboya koyemba loyembo ya ekólo. Mokanda ya mibale ezali ya 2017, elendisaki balakisi bátosa bonsomi ya losambo ya bana-kelasi.

Hastings alobi ete bazongisi bango na kelasi na ntango oyo ebongi mpo etikali moke bábanda baekzamɛ mpo na mboka mobimba: “tozalaki komitungisa ete tokozanga baekzamɛ yango mpo esalemaka kaka mbala moko na mbula.” Soki básalaka baekzamɛ yango te mbɛlɛ babandeli kelasi.

Augustine Semo, molobeli ya Batatoli ya Yehova na Malawi, alobi boye: “Bana-kelasi basepeli ndenge batosi lisosoli na bango mpe topesi bakambi ya eteyelo matɔndi ndenge bandimi kotosa bonsomi ya losambo mpe bazongisi bana mibale wana na eteyelo.”

Bato oyo bapanzi-nsango bakoki kobenga:

Na mokili mobimba: David A. Semonian, Biro ya kozwa bansango, +1-845-524-3000

Malawi: Augustine Semo, +265-1-762-111