Na bamboka mingi, bandeko na biso babongoli ndenge na bango ya kosakola mpe ya koyangana na makita mpo na coronavirus. Na bisika mingi, na esika ya kokende na makita na Ndako ya Bokonzi, bandeko bakómi kosalela video na Internet. Yango wana, bandeko mingi mpe babongoli ndenge na bango ya kopesa makabo mpo na mosala ya kosakola na mokili mobimba, bakómi kopesa yango na nzela ya Internet.

Batatoli ya Yehova na bikólo koleka 112 bazali kosalela donate.pr418.com mpo na kopesa makabo na nzela ya Internet, na ndakisa bazali kosalela karte na bango ya banki.

Lokola bandeko ebele bazali lisusu na likoki ya kopesa makabo na Ndako ya Bokonzi te, bandeko mingi bakómi kopesa makabo mbala moko na sanza na nzela ya Internet, basali ete sanza na sanza, mbongo elekaka mbala moko na donate.pr418.com. Ndeko mwasi Susan Cohen, azali na mbula 74, afandaka na États-Unis, azali kopesa makabo ndenge wana. Alobi boye: “Ezali mpasi te; soki ngai nakoki kosala yango, moto nyonso mpe akoki kosala yango. Nazali na esengo mpo nazali na likoki ya kokoba kopesa makabo mpo na mosala ya kosakola na mokili mobimba.”

Ndeko Eduardo Paiva, afandaka na Brésil, liboso azalaki kokanisa ete kopesa makabo na nzela ya donate.pr418.com ezalaki kaka nzela mosusu ya kopesa makabo soki obosani kopesa na Ndako ya Bokonzi. Alobi boye: “Kala mingi te, nayei komona ete, yango ezali lolenge ya malamu koleka ya kokoba kopesa makabo mpo na mosala ya kosakola na mokili mobimba, na ntango ya mikakatano makasi lokola boye. Tokoki kosalelaka lolenge yango ya kopesa mpo na komonisa botɔndi na biso mpe bolingo na biso na mikolo oyo ya nsuka.”

Ndeko Gajus Glockentin, oyo atalelaka makambo ya mbongo na biro monene ya Batatoli ya Yehova na Warwick, New York, alobi boye: “Ezali kolendisa komona ndenge bandeko bazali kopesa mabɔkɔ mpo na mosala ya kosakola. Tozali na botɔndi mingi mpo na makabo yango. Tozali ntango nyonso kotalela malamumalamu ndenge tokoki kosalela mbongo moke na ebongiseli na biso, mpo tósalela malamu mpenza mbongo oyo bandeko bapesi. Atako bandeko mosusu bamoni ete esengeli kokitisa motángo ya mbongo oyo basengeli kopesa, kasi mposa na bango ya kopesa ebongiseli ya Yehova mabɔkɔ ekiti ata moke te.”​—2 Bakorinti 9:7.