Na mobu ya mosala 2020, Batatoli ya Yehova na mokili mobimba bakutanaki na mikakatano ya sika na mosala oyo bazali kosalela Nzambe. Mikakatano yango mpe emonisi ete bandeko na biso bazali na ekateli ya kotikala sembo epai ya Nzambe mpe ya kosala makambo na bomoko.

Mokakatano ya monene koleka euti na maladi ya COVID-19, oyo etye mobulu na mokili mobimba na ndenge oyo bato bamoná naino te na boumeli ya bambula ebele mpenza.

Batatoli ya Yehova basalaki mbongwana mbala moko ntango maladi yango ebimi. Balukaki ndenge ya sika ya koyangana mpo na kosambela, ya kolendisana mpe ya kosakola nsango malamu.

Talá mwa bansango ya malamu oyo tozwi na boumeli ya mobu yango.​—Masese 15:30.

Na boumeli ya mobu ya mosala oyo, ebongiseli na biso ebimisi Biblia​—Libongoli ya Mokili ya Sika, mobimba to ndambo na minɔkɔ 36. Mpo na mikakatano oyo COVID-19 ebimisi, Babiblia mingi ebimisamaki na nzela ya Internet wana bandeko bazalaki kolanda makita na bandako na bango na nzela ya Internet, na TV to na radio. Lelo oyo Biblia​—Libongoli ya Mokili ya Sika ezali mobimba to ndambo na minɔkɔ 193.

Banda mokolo ya 18/03/2020, bandeko ya Lisangani ya Mikóló-Bakambi bazali kobimisa sanza na sanza video moko oyo ezali kolobela maladi ya coronavirus na jw.org mpe na programɛ JW Library.

Na video ya liboso, ndeko Stephen Lett alobaki ete atako maladi mabe ezali konyokola bato, yango ezali elembo oyo emonisi polele ete “tokómi na nsuka ya mikolo ya nsuka. Elingi koloba ete, eteni ya nsuka ya mikolo ya nsuka!”

Atako ntango oyo ezali na mikakatano mingi mpenza, ndeko Lett alobaki boye: “Lokola tozali Batatoli ya Yehova, tólɛnga na nsɔmɔ te.”

Bavideo yango mokomoko ezalaki na bansango ya kolendisa oyo euti na mokili mobimba. Balapolo yango emonisi ete kolanda litambwisi ya Lisangani ya Mikóló-Bakambi ezali komonisa ete tozali bato ya bwanya. Na bisika mingi, bakonzi ya Leta bakumisi bandeko na biso na ndenge bazwi bibongiseli nokinoki mpe ya malamu mpo na maladi mabe yango.

Banda kala, Batatoli ya Yehova bayanganaka esika moko mbula na mbula mpo na kosala ekaniseli ya liwa ya Kristo. Kasi, na mbula oyo, na bisika mingi, ezalaki malamu te to bapesaki nzela te ya koyangana esika moko. Yango wana, bato na bato to libota na libota elukaki limpa mpe vinyo na yango mpe balandaki diskur na vidéoconférence.

Na bisika mosusu mpe, vidéoconférence ekokaki kosimba te. Yango ezalaki bongo na bafiliale 11 ya Afrika. Bafiliale yango ezwaki bibongiseli ete diskur ya Ekaniseli eleka na TV mpe na radio. Ebongiseli yango epesaki nzela na bandeko koleka 407 000 bákoka kolanda programɛ yango, bakisa mpe ebele ya bato oyo bazali kosepela na solo oyo motángo na bango eyebani te.

Lisangani ya Mikóló-Bakambi bapesaki ndingisa ete bafiliale mosusu elekisaka makita ya lisangá na TV mpe na baradio ndenge basalaki na diskur ya Ekaniseli. Na ndenge yango, basakoli oyo bazali na mikili ya bobola bazwaki likoki ya kolanda makita ya pɔsɔ na pɔsɔ na radio mpe na TV. Tii lelo, filiale 23 esili kosalela ebongiseli yango, kati na yango, bafiliale ya Afrika, ya Amerika ya Nɔrdi, Amerika ya Sudi, mpe ya Mpoto.

Maladi ya COVID-19 esali ete bandeko mingi bákóma na mokakatano ya kozwa biloko ya kobikela. Bakomite ya kopesa lisungi koleka 400 esalemaki na mokili mobimba mpo na kosalisa basakoli oyo bazalaki na likoki te ya kokokisa bamposa na bango. Na mobu ya mosala 2020, Lisangani ya Mikóló-Bakambi epesaki ndingisa ete bápesa mbongo koleka dolare milio 18 na Bakomite ya kopesa lisungi na likambo ya COVID-19 mpo na kosalisa bandeko koleka 330 000.

Ezali mbala ya liboso mpenza ete bandeko bákoka kolanda mayangani ya etúká na Internet to na TV na bandako na bango. Bandeko ya Lisangani ya Mikóló-Bakambi mpe basungi na bango basalaki badiskur ya liyangani, batye yango na bavideo. Mpe bavideo yango ebongolamaki na minɔkɔ koleka 500. Badiskur yango etyamaki na jw.org mpe na programɛ JW Library mpo basakoli mpe bato oyo basepelaka na solo bákoka kolanda yango na kimya mpenza na bandako na bango.

Na bamboka mingi, atako bandeko na biso bazali konyokwama na maladi mabe oyo, basengeli mpe koyikela minyoko mosusu mpiko.

Na Russie, na mbula oyo eleki, bakonzi bakɔtaki na bandako ya Batatoli ya Yehova ebele mpe bakangaki mingi kati na bango. Lelo oyo, bandeko 42 bazali na bolɔkɔ na Russie, mpe 2 mosusu na Crimée. Banda 2017 na Russie, na kolanda ekateli ya Tribinale monene, bakɔtaki na bandako ya bandeko koleka 1 000.

Sikoyo, Batatoli ya Yehova ebele, elingi koloba 52, bazali na bolɔkɔ na Érythrée. Na kati na bango ezali na ndeko Paulos Eyasu, Isaac Mogos, mpe Negede Teklemariam, oyo bakɔtaki bolɔkɔ mpo lisosoli na bango epekisaki bango kokɔta na mosala ya soda banda mokolo ya 17/09/1994. Bandeko mosusu 26 basali na bolɔkɔ mbula koleka zomi.

Tozali kokoba kobondela mpo na bandeko na biso nyonso oyo bazali na bolɔkɔ ete bázala ntango nyonso na mpiko. Toyebi ete bazali komonisa polele ete bazali sembo wana bazali koyika mpiko na minyoko na bango.​—Emoniseli 2:10.

Na mobu ya mosala oyo eleki, Batatoli ya Yehova bamonisi ete bazali sembo epai ya Yehova na ndenge baponi ndenge mosusu ya kopesa litatoli, bazwi mayele ya sika mpo na kolendisana, mpe bazali kotosa na likebi mpenza malako ya Lisangani ya Mikóló-Bakambi mpe ya bakonzi ya Leta.

Na makambo nyonso oyo bandeko na biso bazali kosala mpo na komonisa ete bamipesi na Nzambe, bamonisi polele ete bazali kolinga mpenza Mozalisi na biso. Mpe bosembo na bango ekosalisa bango báyika lisusu mpiko na mikakatano minene oyo ezali liboso.​—Yakobo 1:2, 3.