Na ntango oyo ya maladi mabe, Batatoli ya Yehova bazali kokoba kobimisa Babiblia na minɔkɔ ya sika. Na mokolo ya 28/06/2020, Biblia​—Libongoli ya Mokili ya Sika ebimaki na minɔkɔ minei: Swati, Tsonga, Zulu, ná Chitonga. Libongoli ya Mokili ya Sika ya Makomami ya Grɛki ya Bokristo ebimaki mpe na Créole ya Bélize mpe na Totonaque. Atako bandeko bakutanaki esika moko te mpo na maladi ya mabe oyo ya coronavirus, bazalaki kaka na esengo ntango bazwaki Babiblia yango na Internet. Bandeko balandaki na nzela ya internet bavideo ya diskur ya kobimisa Babiblia oyo basilaki kobongisa liboso.

Ndeko Geoffrey Jackson, ya Lisangani ya Mikóló-Bakambi, abimisaki Biblia​—Libongoli ya Mokili ya Sika na Swati mpe Biblia​—Libongoli ya Mokili ya Sika oyo ebongisami lisusu na monɔkɔ ya Tsonga mpe ya Zulu oyo bakoki kozwa na Internet (talá elilingi ya ebandeli). Basakoli na Afrika ya Sudi mpe na Eswatini balandaki programɛ yango.

Teritware ya filiale ya Afrique du Sud ezali na bato soki milio 18 na ndambo oyo balobaka monɔkɔ Swati, Tsonga, mpe Zulu, na kati ya bato yango basakoli bazali koleka 38 000.

Ndeko Augustine Semo, oyo azali na Komite ya filiale ya Malawi, apesaki liyebisi ete Biblia​—Libongoli ya Mokili ya Sika ebimi na mobimba na yango na monɔkɔ ya Chitonga (ya Malawi).

Babongoli basalaki na boumeli ya mbula koleka mibale mpo na kosilisa Biblia ya sika na Chitonga. Mobongoli moko alobi boye: “Tozali na lolenge misato ya monɔkɔ ya Chitonga. Yango wana maloba oyo basaleli na mboka moko, na mboka mosusu basalelaka yango te. Tosalaki makasi tópona na likebi mpenza maloba oyo bato mingi bakoyeba. Lisusu, tosalelaki maloba na nse ya lokasa mpo na kolimbola maloba oyo bato bameseni na yango mpenza te.”

Mobongoli mosusu alobi boye: “Ekozala mpasi te mpo na basakoli kosalela Biblia yango na mosala ya kosakola mpe na makita mpo ezali na elobeli ya pɛtɛɛ mpe ya polele; ezali mpasi te kotánga yango mpe kokanga ntina ya makambo na yango.”

Ndeko Joshua Killgore, oyo azali na Komite ya filiale ya Amérique Centrale abimisaki Libongoli ya Mokili ya Sika ya Makomami ya Grɛki ya bokristo na Créole ya Bélize. Bato koleka 1 300 batalaki programɛ yango na nzela ya video.

Babongoli 6 basalaki na boumeli ya mbula 1 na sanza 4 mpo na kosilisa kobongola Biblia yango. Na kotalela matomba ya Biblia yango ya sika, mobongoli moko alobi boye: “Nsukansuka, bandeko na biso bazwi Biblia oyo ekomami na bosikisiki mpe oyo bakoki kotyela motema. Ekozala lokola mwinda oyo ezali kongɛngisa boyebi na bango.”

Mobongoli mosusu alobi boye: “Na ntango oyo ya maladi mabe ya coronavirus, bandeko na biso oyo balobaka Créole ya Bélize bakómi na likoki ya kotánga Biblia na monɔkɔ na bango moko. Yango ekobɔndisa bango mpe ekosalisa bango bázala na kimya mpe báyika mpiko na mikakatano oyo ekoya nsima.”

Na Bélize, basakoli bazali 867 na masangá 19 ya Créole ya Bélize. Lisusu, basakoli 58 bazali kosala na États-Unis epai ya bato oyo balobaka Créole ya Bélize.

Ndeko Jesse Pérez, oyo azali na Komite ya filiale ya Amérique Centrale, abimisaki Libongoli ya Mokili ya Sika ya Makomami Grɛki ya bokristo na Totonaque. Bandeko soki 2 200 na masangá 50 ya teritware ya filiale wana oyo balobaka monɔkɔ ya Totonaque balandaki programɛ yango na nzela ya video.

Ekipi ya kobongola esilisaki mosala yango kaka na mbula koleka 3. Biblia yango ekosalisa mingi ntango bandeko bakobanda kosakola nsango malamu epai ya bato koleka 250 000 oyo balobaka monɔkɔ ya Totonaque na Mexique.

Mpo na kokesenisa Babiblia mosusu ya monɔkɔ ya Totonaque ná Libongoli ya Mokili ya Sika ya Makomami ya Grɛki ya bokristo mobongoli moko alobi boye: “Biblia​—Libongoli ya Mokili ya Sika ya Makomami ya Grɛki ya bokristo esaleli elobeli ya mikolo na biso mpe ya pɛtɛɛ mpenza. Sikoyo, ekozala mpasi te tólimbola mateya ya Biblia ndenge na ndenge epai ya bato ya mboka na biso.”

Mobongoli mosusu alobi boye: “Bandeko babandá kozela Biblia lokola oyo banda kala mpenza. Liboso bazwa Biblia​—Libongoli ya Mokili ya Sika ya Makomami ya Grɛki ya bokristo, bandeko bazalaki kobongola bavɛrsɛ ya Biblia ya Espagnol na monɔkɔ ya Totonaque na ndenge na bango mpo na kosala badevuare na makita ya kati ya pɔsɔ. Kasi, sikoyo yango ezali lisusu na ntina te ntango bazali kotánga bavɛrsɛ ya Makomami ya Grɛki ya bokristo.”

Eloko mosusu ya ntina na Biblia yango ya sika ezali maloba na nse ya lokasa, yango ezali kopesa ndimbola ndenge na ndenge ya maloba oyo ebongolami. Lokola maloba yango eyebani mpe epai ya bato oyo balobaka monɔkɔ ya Totonique ya ndenge mosusu, yango esali ete Biblia yango ezala malamu mpo na moto nyonso oyo alobaka monɔkɔ ya Totonique.

Tozali kosepela elongo na bandeko na biso oyo bazwi Biblia na minɔkɔ ya mboka na bango. Toyebi ete kondima na bango ekokóma makasi ntango bazali kosalela ‘mipanga na bango ya elimo’ na mosala ya kosakola to na boyekoli na bango moko.​—Baebre 4:12.