Na mobu 2020, Ekaniseli ya liwa ya Kristo ezalaki likambo moko monene mpenza. Mpo na mbala ya liboso, Ekaniseli elekaki na televizyo mpe na radio na minɔkɔ ndenge na ndenge na bamboka mingi na Afrika.

Yango epesaki nzela na basakoli koleka 407 000 bálanda Ekaniseli, bákisa ebele ya bato oyo basepelaka na Biblia oyo motángo na yango eyebani te. Atako motángo ya bato oyo balandaki programɛ yango eyebani te, programɛ yango elekaki na esika bato koleka milio 150 bafandaka.

Mpo na maladi ya coronavirus, bato ebele na mokili basalelaki video na Internet mpo na kolanda diskur ya Ekaniseli. Kasi basakoli ebele na Afrika bafandi esika Internet mpe baméga ezali na ntalo makasi, bazalaki na likoki ya kolanda diskur ya Ekaniseli na Internet te to kozwa video yango. Yango wana, bandeko ya Lisangani ya Mikóló-Bakambi bandimaki ete Babetele mosusu báyokana na batelevizyo mpe baradio ya mboka na bango na ntalo ya moke mpo na kolekisa diskur ya Ekaniseli.

Liboso ya Ekaniseli, bafiliale 11, ya Angola, Bénin, Cameroun, Côte d’Ivoire, République Démocratique du Congo, Ghana, Malawi, Mozambique, Sénégal, Zambie, ná ya Zimbabwe basololaki na bakompanyi ya TV ná ya radio mpe bayokanaki bálekisa diskur ya Ekaniseli na bisika koleka 36, na bikólo 16.

Angola

Bashɛni 6 ya radio endimaki elekisa diskur ya Ekaniseli na minɔkɔ 6: Ibinda, Kikongo, Kimbundu, Nyaneka, Portuguais, ná Umbundu. Radio elekisaki diskur yango na bisika oyo bato bafandaka mingi mpenza.

République Démocratique du Congo

Moyekoli moko ya Biblia azwaki bibongiseli alanda programɛ ye moko, mpo bandeko na ye balingaka Batatoli ya Yehova te. Kasi ntango akómaki pene ya kolanda diskur, tata na ye abengaki ye na salon alobi, “Diskur ebandi!” Ntango ayaki na salon akamwaki komona libota na bango mobimba bafandi mpo na kolanda diskur ya Ekaniseli na TV. Bato zomi na libota ya moyekoli ya Biblia yango balandaki diskur ya Ekaniseli.

Na mboka moko pene na Luena, moto moko oyo azali Motatoli ya Yehova te alobi: “Bapastɛrɛ na biso basali ata eloko te. Kasi bino, bozali kokoba kosambela Nzambe na bino ata na ntango oyo ya maladi ya coronavirus. Tokoya koyangana elongo na bino!”

Ghana

Televizyo ya mboka endimaki kolakisa diskur ya Ekaniseli na monɔkɔ ya Twi. TV yango elakisaki ata libyangi ya koyebisa bato bálanda Ekaniseli. Longola kolakisa diskur ya Ekaniseli, balakisaki mpe bavideo Mpo na nini Yesu akufaki? mpe Mpo na nini Nzambe atiki nzela na bampasi?, mpe miziki oyo ezali na video Na mokili ya sika mpe Yango oyo na miso.

Sénégal

Ndeko mwasi moko alobi: “Bato bayokaki makambo ya Yehova na TV mpe na radio. Kokamwa mpenza! Tomonaki lipamboli ya Yehova mpe toyokaki esengo. Tosepelaki mpenza ete Yehova azali Nzambe na biso!”

Ndeko mwasi mosusu alobi: “Ntango nayokaki ete diskur ekoleka na TV, nalobaki ete, ‘Yango ezali libaku ya kosala kampanye ya kobenga bato oyo tosalaki te mpo na coronavirus.’ Na mbala moko nabandaki kobenga bato oyo nayekolaka na bango Biblia, oyo nazongelaka, mpe koyebisa bato nyonso oyo nayebani na bango oyo bazali Batatoli ya Yehova te mpo na koyebisa bato ete diskur ekoleka na TV. Bato libwa oyo nayekolaka na bango Biblia ná bandeko na bango balandaki diskur. Ndeko na ngai moko alandaki diskur na TV na Ziguinchor asɛngaki ngai soki tokoki kolobela makambo yango na mozindo, nandimaki na esengo mpenza.”

Ebongiseli oyo emonisi lisusu ete Yehova azali na likoki ya ‘kosala makambo nyonso.’​—Matai 19:26.