Esali sikoyo mbula mitano kobanda bandeko na mokili mobimba bazali kosepela na mateya ya programɛ ya TV JW oyo ebimaka sanza nyonso. Lokola tozali kozela na mposa makasi programɛ ya TV JW ya mobu ya mosala ya 2020 mpe oyo ekolanda, tótalela naino mwa makambo ya malamu oyo esalemaki banda programɛ ya TV JW ya liboso ebimaki na sanza ya 10/2014.

Programɛ yango ebongolami na minɔkɔ 185. Na ebandeli, programɛ ya sanza ya TV JW ezalaki kosalema kaka na Anglais. Na nsima, na sanza ya 05/2015, bandeko ya Lisangani ya Mikóló-Bakambi bandimaki ete programɛ yango ebanda kobongolama na minɔkɔ koleka 40. Sikoyo, kaka na mbula minei oyo eleki, na mwayene, programɛ yango ekómi kobongolama na minɔkɔ 185.

Programɛ yango ekómi na mokili mobimba. Lokola programɛ ya TV JW ebongisami mpo na bandeko ya mokili mobimba, baekipi ya minɔkɔ ndenge na ndenge ekómi kobimisa bavideo mingi mpenza. Mbala mingi programɛ yango esukisaka na video oyo emonisaka masangá oyo ezalaka mosika mpenza na mokili, ezala mpe masangá oyo ezali na Éthiopie, na Islande, na Mongolie, na Saipan, na Tuvalu, mpe na Ouganda. Bato bakómi kolanda programɛ ya TV JW na bikólo 230, ezala mpe na bisika ya mosika na mokili, na ndakisa, na sudi ya Antarctique na teritware ya Heard Island mpe bisanga ya McDonald, epai bato bafandaka mpenza te. Mwayene ya bato oyo balandaka programɛ ya TV JW to bazwaka yango na baaparɛyi na bango na sanza ya liboso nsima ya programɛ mosusu ya sika ekómi bato soki 86 000 000.

Elobelaka makambo ebele mpe ndenge na ndenge. Mpo na kobimisa video moko ya emisyo ya sanza nyonso ezwaka ngonga koleka 60, esangisi makambo lokola badiskur, mituna-lisolo, ba-eksperiansi, makambo ya sika, mpe bilakiseli. Kobanda na loyembo ya liboso Bomoi oyo eleki malamu, oyo ebimaki na TV JW, nzembo oyo tolandaka na video ekómi kobima mbala na mbala na TV JW sanza nyonso. Nzembo yango ebongolami na minɔkɔ 368.

Batambwisi. Na ebandeli, kaka bandeko ya Lisangani ya Mikóló-Bakambi nde bazalaki kotambwisa emisyo ya sanza nyonso. Na nsima, basungi ya komite ya Lisangani ya Mikóló-Bakambi bazalaki kopesa bango mabɔkɔ mpe na bantango mosusu bazalaki kotambwisa yango. Na nyonso, bandeko 29 bazali kotambwisa programɛ ya TV JW to kopesa bandeko ya Lisangani ya Mikóló-Bakambi mabɔkɔ.

Maloba ya botɔndi. Ndeko mobali moko na États-Unis oyo abɛlaki AVC mpe azali kokoba kobunda na mwa bampasi oyo maladi yango etiki ye na yango, azali na botɔndi mingimingi mpo na nzembo oyo ebimaka na TV JW. Alobi boye: “Miziki kitoko yango ekómisaka makasi kondima na biso epai ya Yehova mpe na maloba na ye, ebongisaka makanisi na ngai mpe esalisaka ngai mpenza nalonga komekama ya sika na bomoi ngai. Nazali kokamwa ndenge miziki oyo esalisi ngai nabongisa lisusu bizaleli na ngai ya bokristo. Matɔndi mingi mpo na ebongiseli oyo!”

Nsima ya kolanda emisyo ya sanza ya 11/2016, bato ya libota moko na États-Unis oyo mwana na bango ya mobali akufaki na kanser, bakomaki boye: “Tolelaki na mai ya miso ntango tolandaki loyembo Yango oyo na miso na video. Biso moko tomonaki ndenge baboti yango batyaki makanisi na bango na paradiso. Ntango nakanisi ete nakoki ata moke te koyika mpiko na mpasi oyo eutaka na kotungisama na makanisi, ntango nyonso Yehova asalisaka biso tóyeba ete ayebi mpe ete akosalisa biso tólonga yango. Video yango esalisaka ngai mpenza namona ete Yehova ayanolaka na mabondeli ebele oyo tosalaka uta na motema.”

Mwasi moko ná mobali na ye na Ukraine bazalaki na botɔndi mingi mpo na baemisyo ya TV JW, balobaki boye: “Na lisalisi ya baemisyo ya TV JW, bandeko ya Lisangani ya Mikóló-Bakambi bakómaki bato ya libota na biso!”

Tozali kopesa Yehova matɔndi mpo na bibongiseli wana oyo eyaka na ntango oyo ebongi, oyo ezali kosangisa basaleli na ye na mokili mobimba.​—1 Petro 2:17.