Kopesama ya badiplome ya Eteyelo ya Gileade ya mbala ya 148 ezalaki kaka lokola biteyelo ya Gileade mosusu oyo eleká, kasi ekesanaki na likambo moko: bayangani bazalaki na Auditorium te. Bayangani nyonso balandaki programɛ yango na nzela ya video. Na ntango oyo maladi mabe ezali konyokola bato na mokili mobimba, programɛ yango ya kopesama ya badiplome ya Gileade ezali moko ya elembo oyo emonisi ete ebongiseli ya Yehova eyebi kobongola makambo soki esengeli.

Programɛ yango esalemaki mokolo ya 14/03/2020, na Patterson, na etúká ya New York, epai kelasi ya Gileade esalemaka. Ndeko Stephen Lett, ya Lisangani ya Mikóló-Bakambi, azalaki prezida ya programɛ yango. Bana-kelasi nyonso bazalaki 55. a

Mwa bapɔsɔ liboso ya programɛ ya kopesa bana-kelasi badiplome na bango, maladi ya coronavirus (COVID-19) ebimaki, mpe bansango na mokili mobimba ekómaki kaka yango na yango. Ndenge tolobelaki yango liboso na eteni oyo elobi: “Bansango na jw.org,” biro monene ya Batatoli ya Yehova na mokili mobimba ezalaki kolandela likambo yango na mokili mobimba mpe kopesa masangá nyonso malako na boyokani na makambo oyo bakonzi ya leta bazalaki koloba.

Moko na malako oyo bapesaki ezali ete makita ya minene esalema lisusu te. Nsima ya kotalela likambo yango mpe makambo mosusu, Lisangani ya Mikóló-Bakambi ezwaki ekateli ete bato ya libándá báya na molulu yango te. Lisusu, bazwaki ekateli ete moto moko te aya na esika oyo programɛ yango ekosalema. Bandeko ya Betele ná bana-kelasi ya Gileade bapesaki ndakisa malamu na ndenge batosaki malako yango.​—Yoane 13:34, 35.

Nzokande, basalaki video mpo na bapaya ya bana-kelasi ya Gileade mpe bandeko ya Betele. Ebongiseli yango esalaki ete bandeko koleka 10 000 na mokili mobimba, na kati na bango, baninga ná bandeko ya bana-kelasi, bálanda programɛ yango mbala moko.

Mposa ya Lisangani ya Mikóló-Bakambi ezali ete makita mpo na losambo, mingimingi makita ya pɔsɔ na pɔsɔ, ekoba kosalema mpo ezali losambo na biso atako maladi mabe ya coronavirus ezali. Yango wana, Lisangani ya Mikóló-Bakambi epesaki bafiliale na mokili mobimba malako ya sikisiki mpo na kobongola ndenge ya kosala makita ya lisangá na kotalela makambo na esika bazali. Na ntango mosusu, ekosenga koyangana bato moke, ntango mosusu mpe kosala makita na nzela ya video. Tozali na elikya ete bandeko na mokili mobimba bakokoba kozwa malako mpe bilendiseli oyo ebongiseli ya Yehova ezali kopesa masangá nyonso.

Emonani polele ete eloko moko te ekoki kopekisa nguya ya Yehova esalisa ebongiseli na ye mpo na kolonga mikakatano, ezala ya ndenge nini.​—Nzembo 18:29.