Liyangani ya etúká ya mobu 2020: ‘Bósepelaka ntango nyonso!’ ezali moko ya mayangani ya minene oyo ekeseni mpenza na mayangani nyonso oyo Batatoli ya Yehova basalá. Liyangani yango ebongolamaki na minɔkɔ koleka 500 mpe bato balandaki yango nde na bandako na nzela ya video. Babongoli basalaki mosala na bango atako bazalaki na bisaleli mingi te mpe ngonga moke.

Ndeko moko oyo abongolaka na monɔkɔ ya Kikuyu, na Kenya, alobi boye: “Lokola bandeko basengelaki koya na Betele te, tozalaki na bato mingi te ya kokɔtisa mingongo. Na yango, tosalelaki bandeko oyo bazali mosika, tosepelaki komona ndenge elimo ya Yehova ezali kosala mosala.”

Bandeko oyo babongolaka na monɔkɔ bajɛstɛ ya Corée mpe bandeko oyo babongolaka na monɔkɔ ya Corée bakutanaki mpe na mikakatano ya ndenge wana. Bandeko oyo bayaka kopesa mabɔkɔ na bikipi yango, bazalaki na likoki te ya koya kokɔtisa mingongo na Betele.

Mpo na kolonga mokakatano yango, bandeko basalaki bastidio ya kokɔtisa mingongo na bandako na bango. Bandeko bapesaki bisaleli mingi oyo basengelaki na yango mpo na kokɔtisa mingongo. Longola yango, lokola mayangani ya zongazonga esalemaki te, filiale esalelaki bakamera ya Ndako ya Mayangani mpo na kosala bavideo ya monɔkɔ ya bajɛstɛ.

Na Vénézuela, babongoli mosusu bamonaki mpasi mingi na mosala mpo Internet ezali malamu te. Babongoli mosusu bazalaki na bisaleli mingi te ya kokɔtisa mingongo. Kasi babongoli yango basalaki nyonso oyo bakoki mpo na kosilisa mosala na bango. Na ndakisa, babongoli mosusu, basalelaki biteni ya matela mpo makɛlɛlɛ ekɔta te ntango bazali kokɔtisa mingongo.

Na Juba, na Soudan du Sud, ezali na ekipi moko ya babongoli na monɔkɔ ya Zande. Moko ya babongoli alobi boye: “Ntango nayokaki ete tokosala bavideo ya liyangani mobimba, nalobaki ete ‘ekoki kosalema ata moke te! Tozali na likoki te ya kokɔtisa mingongo mpe kosala bavideo 90 mobimba na sanza mibale mpamba.’ Sikoyo lokola tosilisi mosala yango, nandimi na motema moko ete eloko moko te ekoki kopekisa Yehova kokokisa mokano na ye. Kosala ndenge wana ezali esengo mpenza!”​—Matai 19:26.

Liyangani ya etúká ya mobu 2020: ‘Bósepelaka ntango nyonso!’ ezali mpenza likabo oyo euti na Yehova, “oyo mokano na ye ezali ete bato ya ndenge nyonso bábika mpe bázwa boyebi ya sikisiki ya solo.”​—1 Timote 2:4.