Na mokolo ya 13 tii 17/07/2021, mbula makasi ebɛtaki mpe etondisaki bibale mingi na Belgique, na Allemagne, na Luxembourg, mpe na Pays-bas. Bato mingi bakufaki. Toyebi mpenza te na bosikisiki makama oyo mpela yango ebimisaki. Yango ezali mpela oyo eleki mabe na bampela nyonso oyo esalemaki na boumeli ya mbula 100 oyo eleki.

• Ata ndeko moko te azokaki makasi to akufaki

• Basakoli soki 304 batikaki bandako na bango mpo na mwa ntango

• Bandako soki 100 ebebisamaki makasi

• Bandako soki 242 ebebisamaki makasi mingi te

• Bandako ya Bokonzi 11 ebebisamaki

• Bakomite 4 ya kopesa lisungi esalemaki: 1 na Belgique, 2 na Allemagne mpe Luxembourg, mpe 1 na Pays-Bas

• Bakomite ya kopesa lisungi ezali sikoyo kobongisa mosala ya kopɛtola bandako, na ndakisa kopepa mai mpe kolongala potopoto, mpe misala ya mikemike oyo esengeli kosalema nokinoki

• Bakomite ya kopesa lisungi mpe bankulutu ya bisika oyo makama esalemaki babongiselaki bandeko bisika mosusu ya kofanda mpo na mwa ntango mpe mai ya komela mpo na baoyo basengelaki kolongwa bisika oyo makama esalemaki

• Bakɛngɛli ya zongazonga ya bisika oyo makama esalemaki bazali kolendisa mpe kobɔndisa bandeko na nzela ya Biblia

• Masangá etikaki te kosala makita na nzela ya video. Bandeko ya komite ya filiale bazali kobɔndisa mpe kolendisa basakoli ya bisaka yango

• Ntango bazalaki kopesa lisungi yango, bandeko bazalaki kolanda malako etali komibatela na COVID-19

Bankulutu ya lisangá moko na Pays-Bas basalisaki ndeko mwasi moko ya mobange mpo alongwa na esika oyo likama esalemaki. Na nsima, babengaki mwana na ye ya mobali oyo azali Motatoli ya Yehova te mpo na koyebisa ye ete azwi likama te. Na nsima, mwana yango alobaki na mama na ye: “Ozali mpenza na lingomba moko kitoko! Bazali mpenza kokipe yo malamu!”

Na Belgique, ekipi moko ya babomi-mɔtɔ (sapeurs-pompiers) bazalaki kotala ndenge bandeko na biso bazalaki kopesa bato lisungi. Bato yango bapesaki bandeko na biso longonya mpo bazalaki kosalela bisaleli ya malamu mpe bazalaki kosala makambo na molɔngɔ. Ndenge moko mpe na Allemagne, ekipi moko ya babomi-mɔtɔ bakamwaki komona ndenge bandeko bazalaki kolanda na motema moko malako oyo etali koboma mɔtɔ. Moko na bango alobi: “Soki ekipi ya boye ezalaki ata bipai nyonso...”

Bandeko oyo bakutanaki na makama bazali na botɔndi mingi mpo na lisalisi oyo ebongiseli ya Yehova epesaki bango. Bazali mpe na botɔndi na Lisangani ya Mikóló-Bakambi ndenge balendisaka bandeko bámibongisaka ntango nyonso mpo na makama. Kasi libosoliboso, bazali na botɔndi epai ya Yehova, oyo asalaka ete bato na ye ‘báfanda na kimya mpe bátungisama te mpo na nsɔmɔ ya mpasi’​—Masese 1:33.