Lokola mibange bazali na likama ya kozwa noki maladi ya coronavirus, bandeko na biso oyo bazali mibange batosaki malamu mpenza malako ya bakonzi oyo etali bokɔlɔngɔnɔ ya nzoto mpe batikalaki na bandako na bango, bazalaki kobima te. Kasi, batikalaki bango moko te mpe bakangaki mabɔkɔ te. Bazali kosalela mayele ndenge na ndenge ya teknoloji mpo na koyangana na makita mpe kosakola.

Na Rome, na Italie, ndeko mwasi moko oyo azali na mbula 94 mpe azwá batisimo na mobu 1952, azalaki lisusu na likoki ya kobima libándá te liboso kutu maladi mabe oyo eya. Atako azali kolanda makita na JW Stream, esalaki mwa ntango azalaki na likoki ya kolanda makita ya lisangá na ye te. Nzokande, sikoyo, bankulutu ya lisangá na bango bazwi bibongiseli alandaka makita na nzela ya video, na ndenge yango, azali komona bandeko ya lisangá na ye mpe kolanda makita.

Na engumba Spanish Fork, na etúká ya Utah, na États-Unis, ndeko mwasi moko na nkombo Stephanie Aitken, oyo akufá matoi, afandaka na ndako oyo babatelaka mibange mpe sikoyo epekisami ete moto ya libándá akɔta kuna. Nkulutu moko ná mwasi na ye basalisaki ndeko yango atya programɛ ya kolanda na makita na nzela ya video na tablɛti na ye, bapesaki ye malako ya kotya programɛ yango na vitrɛ ya porte ya ndako yango na elobeli ya bababa. Ntango kaka ndeko Aitken asilisaki kotya programɛ yango, asepelaki mingi, ayambi tablɛti na ye. Azali kosepela ndenge azali na likoki ya kolanda makita ya lisangá na ye sikoyo.

Ntango bandeko na biso na mokili mobimba, ná baoyo bazali mibange, bazali kosalela mayele ya teknoloji mpo na kokoba kosakola mpe koyangana na makita na eleko oyo maladi mabe, ezali kozongisa na makanisi na biso elaka ya Yehova oyo elobi ete bato na ye bakomɛla mpenza “miliki ya bikólo.” (Yisaya 60:16) Toyebi ete ntango nyonso Yehova akokóma oyo basaleli na ye na mabele basengeli na yango na ntango ya mpasi.