Na mokolo ya 16/11/2018 na mpokwa, bapolisi 200 ya sireté (FSB) bakɔtaki na bandako mwambe ya Batatoli ya Yehova na Crimée.

Lokola batungisamaki mingi mpe banyokwamaki na makanisi mpo na ndenge bapolisi ya FSB oyo balataki maskɛ na elongi bakɔtelaki bango, tansiɔ ya Batatoli ya Yehova mibale emataki mpe bamemaki bango na lopitalo. Lisusu, tozali na mawa mpo toyoki ete ndeko mwasi moko, oyo azalaki na zemi abotaki mwana mpe mwana yango akufaki.

Ntango bakɔtelaki bandeko, bapolisi babɛtaki Aleksandr Ursu oyo azali na mbula 78. Bapusaki ye na efelo, batindikaki ye na mabele, mpe batyaki ye minɔti na mabɔkɔ. Lisusu, bapolisi bazalaki kotunatuna Batatoli ya Yehova mingi mosusu mituna.

Na mikolo oyo, bafundi ndeko Sergey Filatov (na lobɔkɔ ya mobali) na likambo. Bakonzi bafundi ye na likambo na kolanda Artikle 282.2, eteni 1, ya mibeko ya Russie oyo etali bato ya mobulu​—oyo Russie elobaki ete péninsule de Crimée esengeli kotosa yango. Ndeko Filatov azali na mbula 47 mpe tata ya bana minei. Azali Motatoli ya Yehova ya liboso na etúká ya Crimée oyo bafundaki ye na likambo na kolanda mibeko ya Russie ya kobundisa makambo ya kolekisa ndelo.

Atako bandeko na biso bazali kotungisama na ndenge bazali kokɔtela bango na bandako mpe konyokola bango, tondimi na mpiko nyonso ete Nzambe na biso, Yehova, akopesa bango makasi na ntango oyo ya mikolo ya nsuka oyo etondi na komekama.​—Yisaya 41:10.