NEW YORK. Batatoli ya Yehova bakobanda mayangani na bango ya mikolo misato mokolo ya 19/05/2017, motó ya likambo na yango elobi “Kotika te!” Bisika eponami mpo na mayangani yango na mokili mobimba, oyo ekokende tii ebandeli ya 2018. Ndenge moko na bambula oyo eleki, Batatoli ya Yehova bazali kopesa mabɔkɔ na kampanye ya kobengisa bato na mayangani yango na mokili mobimba.

Kokɔta na mayangani yango ezalaka ofele mpe tokɔngɔlaka mabonza te. David Semonian, molobeli ya Biro monene ya Batatoli ya Yehova oyo ezali na Warwick, New York, alobi boye: “Na mbula eleki, bato pene na milio 13 bayanganaki na mayangani na biso. Tozali na elikya ete na mbula oyo bato bakoya mingi koleka.”

Programɛ yango ekabolami na biteni 52 mpe ekosalema na lolenge ekeseni, na ndakisa badiskur ya mikuse, mituna-lisolo mpe bavideo ya mikuse. Longola yango, eteni misato ya filme oyo motó ya likambo elobi Kanisá mwasi ya Lota ekolakisama na nsima ya midi ya mikolo nyonso wana misato. Okoki komona badati mpe bisika oyo mayangani yango ekosalema na mokili mobimba na site jw.org. Bapanzi-nsango bakoki kotuna Biro ya Batatoli ya Yehova ya mboka oyo bazali mpo na koyeba makambo mosusu, ata mpe nkombo ya molobi moko soki bakolinga kosala reportage ya molulu yango.

Semonian, alobi lisusu boye: “Mikakatano ya bomoi ekoki kolongola biso kimya to mpe kopesa biso mposa ya kotika. Liyangani na biso ya mbula oyo ekosalisa ezala Batatoli ya Yehova to bato mosusu mpo ebongisami mpo na kolendisa moto mokomoko ayika mpiko mpe ayeba ndenge malamu ya kolonga mikakatano na ye.”

Moto oyo bapanzi-nsango bakoki kobenga:

Mpo na mokili mobimba: David A. Semonian, Biro ya kozwa bansango, +1-845-524-3000