Na mokolo ya 15 mpe 16/08/2020, Libongoli ya Mokili ya Sika ya Makomami ya Grɛki ya bokristo, ya kotánga na Internet to na aparɛyi, ebimaki na monɔkɔ ya Changana mpe Makua mpo na basakoli ya Mozambique. Basakoli koleka 8 000 balobaka monɔkɔ ya Changana mpe basakoli koleka 1 700 balobaka monɔkɔ ya Makua.

Ndeko David Amorim, oyo azali na Komite ya Filiale ya Mozambique, asalaki naino badiskur ya kobimisa Babiblia yango na nzela video, mpe basakoli balandaki yango na nsima. Lisusu, bandeko bazwaki ndingisa ete balekisa diskur yango na TV mpe na baradio koleka 30.

Balobaka monɔkɔ ya Changana mingi mpenza na bitúká mibale oyo ezali na sudi ya Mozambique, mpe bato oyo balobaka yango bazali soki milio 1,9. Monɔkɔ ya Changana ezali lokola monɔkɔ ya Tsonga oyo elobamaka pene na Afrika ya Sudi.

Teritware ya bato ya Makua ezali na bitúká ya nɔrdi ya Mozambique. Monɔkɔ ya Makua elobami na bato soki milio 5,8 mpe ezali monɔkɔ ya mboka oyo elobamaka mingi na Mozambique.

Na boumeli ya bambula mingi, ezalaki mpasi makasi mpenza mpo basakoli oyo balobaka minɔkɔ wana bázwa Biblia. Babiblia ezalaki ntalo mingi, mpe mbala mingi, bato oyo bazalaki kotɛka yango bazalaki koboya kotɛkɛla Batatoli ya Yehova. Mobongoli moko alobi boye: “Namoná masangá mingi na Biblia kaka moko oyo bazalaki kotika yango na Ndako ya Bokonzi mpo bandeko oyo bakosala badiskur mpe badevuare na makita ya kati ya pɔsɔ básalela yango.”

Tozali kosepela mingi elongo na bandeko na biso oyo bazwi Makomami ya Grɛki ya bokristo na monɔkɔ ya Changana mpe Makua. Toyebi ete Babiblia yango ekosalisa bato mingi bázwa “boyebi ya sikisiki ya solo.”​—1 Timote 2:3, 4.