Bandeko na biso soki 3 000 bapesi mabɔkɔ na kampanye sipesiale mpo na kopesa litatoli na bisika ya bato nyonso na libaku ya masano ya panaméricains mpe parapanaméricains oyo esalemaki na Lima, na ekólo Pérou. Masano yango, oyo ebandaki na mokolo ya 26/07/2019, mpe ekosuka na mokolo ya 01/09/2019, ekosangisa basani koleka 8 500 mpe bato 250 000 oyo bakouta na mikili ndenge na ndenge bakoya kotala masano yango.

Basakoli batyaki bashario 100 na bisika 53 ekeseni mpo na kopesa malamu litatoli na bato oyo bakouta na mikili ndenge na ndenge. Mikanda ezalaki na monɔkɔ ya Aymara, Anglais, Français, Portugais, Quechua (Ayacucho), mpe Espagnol. Na bashario mpo na kopesa litatoli, ezalaki na bavideo na elobeli ya bababa ya Pérou mpo na bapaya oyo bazalaki bababa mpe baoyo bayokaka malamu te.

Ndeko Kemps Moran Hurtado, oyo azali kotambwisa kampanye yango, alobaki boye: “Kampanye oyo ekosala ete tópesa litatoli na bato ebele mpenza oyo bauti na bisika mpe mimeseno ekeseni, mpo masano yango ezali kobenda bato oyo bakouta mikili ndenge na ndenge. Kopesa litatoli na bisika ya bato nyonso ezali na ntina mingi na mosala ya koteya bato Biblia​—esalaka ete bato nyonso bámona mosala oyo Batatoli ya Yehova basalaka.”

Tozali na esengo ya koyoka ndenge mosala yango ezali se kokende liboso. Tozali na kondima ete Yehova akokoba kopambola mosala ya bandeko na biso na Pérou wana bazali kokoba kosakola esika nyonso oyo bakoki kokuta bato.​—Misala 17:17.