Na mokolo ya 26/06/2018, bamonisi ya ambasade ya Thaïlande na Pérou basalaki vizite na filiale ya Batatoli ya Yehova oyo ezali na mboka-mokonzi Lima. Bazalaki na mposa ya kopesa Batatoli ya Yehova matɔndi mpo na lisalisi oyo bazali kopesa bana-mboka ya Thaïlande oyo bazali na bolɔkɔ na Pérou.

Banda 2007, Batatoli ya Yehova na Pérou bakendaka kotala bato oyo bazali na bolɔkɔ mpo na koteya bango Biblia. Kasi kobanda 2013, bakendaka na bolɔkɔ moko oyo bana-mboka ya Thaïlande bazali. Likambo yango ekamwisaki ambasadɛrɛ ya Thaïlande, yango wana asepelaki kosala vizite na biro ya filiale ya Pérou.

Bato oyo bautaki na ambasade yango mpo na kosala vizite ezalaki Angkura Kulvanij, chargé d’affaires; Pathompong Singthong, sɛkrɛtɛrɛ ya liboso mpe ambasadɛrɛ, mpe Pradthana Pongudom, mosungi ya ambasadɛrɛ. Basalaki vizite yango elongo na bandeko mosusu ya komite ya filiale. Na vizite yango, ambasadɛrɛ amonaki mosala monene oyo esalemaka mpo na kobongola mikanda na biso na minɔkɔ libwa oyo elobamaka na mboka yango.

Na mokanda moko oyo ambasade etindelaki biro ya filiale, ambasade emonisi “botɔndi mpe esepeli” ndenge bandeko na biso bazali komipesa mpo na kosalisa “bato oyo bazangi makoki mpe oyo bakipaka bango te na Pérou, ata soki bazali bato ya lingomba nini to ya mboka nini.” Ambasade ekumisaki mpe Batatoli ya Yehova mpo na “milende oyo bazali kosala mpo na kokitisa mikakatano oyo bato ya bolɔkɔ na Thaïlande bazali na yango mpe ndenge bazali kosalisa bango bábongisa lisusu bomoi na bango.”

Botɔndi oyo bamoniseli bandeko na biso na Pérou emonisi polele bolamu oyo Batatoli ya Yehova basalelaka bato ndenge bakobaka kosakola nsango ya Biblia epai ya bato ya ndenge nyonso.​—1 Bakorinti 9:22.