Na mokolo ya 07/01/2020, mabele eninganaki makasi mpenza na Porto Rico (magnitude 6,4), mpe na nsima koningana mokemoke ya mabele ekobaki kosalema mbala ebele mpenza. Na mokolo ya 11/01/2020 na ntɔngɔ, mabele eninganaki lisusu na esanga yango (magnitude 5,9).

Na bisika mingi oyo mabele eninganaki, kura ekatanaki mpe sikoyo bato bazali kolala libándá mpo ekómi likama kolala na bandako na bango. Filiale ya États-Unis elobi ete ata ndeko na biso moko te azoki to akufi. Kasi, bandeko 248 balongwaki na bandako na bango. Lisusu, bandako 8 ya bandeko ebukanaki, mpe bandako 70 ebebi makasi. Bandako ya Bokonzi 10 ebebi. Komite ya kopesa lisungi elongo na bakɛngɛli ya zongazonga ya kuna bazali kobongisa lisalisi mpe kolendisa bandeko oyo bazwi likama wana.

Atako bandeko na biso bakutani na mikakatano wana, bazali kokoba kosalela Yehova. Ndeko Robert Hendriks, oyo akambaka makambo ya bansango na filiale ya États-Unis, alobi boye: “Makama ya boye esalemaka mingi na Porto Rico, kasi ndenge mabele eningani mbala oyo etungisi bandeko mingi mpenza. Nzokande, tolendisamaki na komona ete bandeko balɛmbi nzoto te mpo na yango. Na bisika mosusu, bandeko bazali kokoba kokende na makita mpe kosakola atako bazali na kura te mpe mai te. Bankulutu bazali kosala mosala monene mpo na kolendisa bandeko, kobɔndisa bango, mpe kosunga baoyo nyonso basengeli na lisalisi.”

Tolendisami na ndenge bandeko bazali kosepela na bilei ya elimo atako bazali komona mpasi na makama. Tozali kobondela Yehova ete akoba kopesa bango kimya ya makanisi.​—Nzembo 119:165.